Ua faalauiloa mai e le International Rugby League le talimalo ai o Ausetalia i le taamilosaga o le Ipu o le Lalolagi o le Lakapi Liki i le 2026, lea o le a tausinio ai ‘au a alii, tamaitai ma i latou foi o loo faaaogā nofoa faataavalevale poo wheelchairs.
O le taamilosaga o le Ipu o le Lalolagi o le Lakapi Liki o le a faagasolo ia Oketopa ma Novema o le 2026, ma e 26 ‘au o le a tausinio ai e aofia ai ‘au e 10 a alii, 8 ‘au a tamaitai, ma le 8 ‘au a i latou e faaaogā wheelchairs.
O isi taaloga o le taamilosaga o le a faia i Papua Niu Kini, o se avanoa foi o le a faalauiloa ai aganuu a le Pasefika, auā o se vaega tele o i latou o le a aofia i nei ‘au taaalo a alii ma tamaitai e mai tupuaga Pasefika.
Mo ‘au a alii, o lea ua mautinoa le ofi atu o Ausetalia, Samoa, Niu Sila, Egelani, Lepanona, Tonga, Fiti ma Papua Niu Kini i le taamilosaga o le Ipu a le Lalolagi o le Lakapi Liki o le 2026.
O ‘au nei na mafai ona latou ausia le vaega o quarter-finals i le Ipu o le Lalolagi o le Lakapi Liki lea na faia i Egelani i le 2022.
Ae mo nisi ‘au, e iai isi taamilosaga o le a faagasolo i se taimi lata mai, ina ia mafai ai ona maua ni o latou avanoa e agavaa ai e taaalo i le taamilosaga o le Ipu a le Lalolagi o le Lakapi Liki.
O le uluai Ipu o le Lalolagi o le Lakapi Liki na faia i Falani i le tausaga e 1954, ma e lona lua le lakapi liki i taaloga pito sili ona leva talu ona faia a latou taamilosaga o le Ipu o le Lalolagi, e sosoo atu i le Ipu o le Lalolagi o le Soka, le FIFA World Cup.
E eseese lava le aofai o ‘au sa auai, na amata mai le na o le 4 ‘au seia oo ina ausia le 10 ‘au i le 2008, 14 ‘au i le 2013, ma le 16 ‘au i le 2017 ma le 2022.
