Tusia: Maina Misa Foma’i – Vai

Ua talia ai nei se faaiuga a le faamasinoga i le tagi a le Afioga ia Toomata Norah, le Vaega Fa’aupufai o le Faatuatua i le Atua Samoa ua Tasi, faapea ai le Tofa Lolomatauama Eseta Faalata Mataituli, ua tuuina atu i le Faamasinoga, e lu’iina ai le talafeagai o le taimi na faaogaina e le Itu Tali Muamua (Komesina o Faigapalota) e tatau ai ona faaoga le vaega o le tulafono 44(1A) faapea ai le faia o se faaiuga i le tulaga ua agavaa ai tamaitai e toalua i numera (calculation) i lalo o le vaega o le tulafono 44 (1B).

O le aso 29/30 o Novema 2021 na tuuina mai ai le Faamaoniga mai le Ao Mamalu o le Malo o Samoa i le filifilia ai o ia sui tamaita’i e toalua le Afioga ia Alofa Tuuau ma Faagasealii Sapoa Feagia’i, faatasi ma i latou na manumalo mai i le Faigapalota Laitiiti.

O le sueuseina o lea mataupu i le Faamasinoga Maualuga sa auai mai le Afioga i le Faamasino Sili i le fesootaiga i le video link sei vagana ai Afioga i alii Faamasino Sinia ia Vui Clarance Nelson ma Lesatele Rapi Vaai lea sa auai i le Potu Faamasino ananafi.

Sa talosaga mai le Afioga i le Fofoga Fetalai ia Papalii Taeu Masepa’u tauala mai le tamaitai loia ia Leilani Tamati sa tulai mo ia i fesootaiga i le video link e fia faopoopo mai o se itu i le faagasologa o le suesueina o lenei mataupu peitai na teena e itu tali.
O itu o le Faamasinoga e aofia ai le itu tali, o le Komesina o Faigapalota, o le Ofisa o le Loia Sili, o Aliimalemanu Alofa Tuuau, o Faagasealii Sapoa Feagia’i ma le Vaega Faaupufai o le HRPP. O le Afioga Aumua Ming Leung Wai, Fuimaono Sefo Ainuu, Lucymarie Sio Ofoia loia sa tulai mo le itu tali.

Ae o le Afioga Taulapapa Brenda Heather Latu ma Muriel Lui na tulai mo le Itu Tagi.

FINAUGA A LE ITU TAGI

O loo fesiligia e le Itu Tagi le faauigaga tonu o le tulafono 44 (1B) (b) ma le (5).
O loo fesiligia fo’i le talafeagai o le faaogaina o le tulafono 44 (1A) ma le (1B) i le aso 29 o Novema, 2021….atoa ai la ma le…fesili pe o lalago faatasi le tulafono 44(1B) ma le Vaega 15 o le Faavae.
O loo faapea mai Taulapapa o le 44 (1B) (b) i le tulafono o loo faapea mai…
(1B) Afai i le maea ai o soo se faiga palota aoao:
(b) e itiiti ifo mai le aofa’i faatonuina o sui tamaita’i ua filifilia i lalo o le fuaiupu (1), o le aofa’i faatonuina o sui tamaita’i o loo totoe (pe afai e iai) e maua le fuainumera aupito o maualuga o palota, e tatau ona avea ma Sui Usufono faaopoopo mo faamoemega o le fuaiupu (1A).
(5) I totonu o lenei Mataupu, sei vagana ai ua manaomia e le mataupu se isi uiga e ese ai:
“Fuainumera aupito maualuga o palota” o lona uiga o le pasene o le aofaiga atoa o palota aloaia a se itumalo faaalalafaga na mauaina e se sui faatu tamaita’i;
O loo faailoa mai e Taulapapa i le finauga a le itu tagi o loo atagia i le faaiuga a le Faamasinoga Maualuga faapea ai le Faamasinoga Apili le vaega o loo iai le sui faaopoopo i le tulafono 44 ma o le tusiaina o ia vaega faaopoopo ua le’o sa’o tonu.
O loo tonu le Vaega 44(1A) i le Faavae peitai o loo foliga mai ua tele nisi o mea na faia e le au faitulafono i lea fuaiupu ua mafua ai ona taunuu mai i le feleiloga’i, ma le le mautonu ma le tele o faauigaga.

O le veaga 44(1A) o loo faaogaina mai le upu Sui Tamaita’i ……e iai le numera maualuga o palota, peitai i le 44 (5) o loo agai i le pasene o le aofaiga o palota faaogaina. E tusa ai ma le talitonuga o le itu tagi o nei faaupuga ma lona eseesega ua eseese ma ua tatai ai i le tele o mau mea ua tutupu nei.

O loo faapea mai fo’i le itutagi o le tele o le eseesega ua faatupu mai e le fuaiupu (1B) ma le (5) ua le o tutusa ai ma le faaiuga na tau iai le sailiga a le Faamasinoga o Apili lea o loo faailoa ai le faauigaga, ua mafai ai ona faateleina tamaitai ose faalauiloaina o vaega o le Faavae o loo tautala mai i le aiatatau faale tagata soifua. E taua ai le iloa tonu o se faamaninoga poo fea tonu faauigaga o fuaiupu nei o loo feteena’i nei e tatau ona faaoga.

Ua faailoa foi i le finauga a le itu tagi tulaga taua i le itu faatemokalasi, o sui o le malo, o le unai o avanoa tutusa, o aiatatau faale palota e pei ona atagia mai i le vaega 44 o le tulafono, o le toe faalaeiauina o le sao o tamaitai i Palemene ma faiga faapolokiki, e pei ona faailoa i le faaiuga lea a le Faamasinoga. E pei lava foi ona iai isi faaiuga a le faamasinoga e taua ai le fa’aitetega i le faamaninoina o vaega talafeagai i le faauigaina ma faaoga o vaega o le tulafono atoa ai ma faavae faatemokalasi ma isi aia tatau.

Na taua foi o le isi tulaga taua lava o le tulafono 44 o loo talanoa mai i le Talaaga o mea, lea o loo faamatala mai i le itulau o Samoa ma malo Aufaatasi faapea le fono aoao a le Pasefika i le aoaoina ina ia unai tamaitai i mataupu tau polokiki.

O le toe faatulagaga lea na faasolomuli ai le tulaga faaletonu o le faaitiitia o tamaitai i le Palemene ae faafofoga i le tele o fonotaga ma taumafaiga i maliega atoa ai ma le Vaega 15 o le Faavae, e unai ai le faatoateleina o Tamaitai i le Palemene, lea sa taimua ai le Vaega Faaupufai o le HRPP e palota le 2/3 i le Palemene ma a latou faaiuga e faataunuu loa.
Atoa ai ma le maliega ina ia faaitiitia ituaiga faailogalanu uma faasaga i Tamaita’i (CEDAW) lea o loo i le fuaiupu 7 o le tulafono ao lona parakalafa (a) ma le (b) o loo faapea mai e tatau i Vaega faaupufai uma ona faaitiitia soo se faailogalanu faasaga i Tamaita’i i mataupu tau polokiki ma le malo ae ia mautinoa e aia tutusa ma alii.

O loo fesiligia foi i le finauga a le Itu tagi pe sa talafeagai le taimi na faaogaina ai le vaega 44 (1A) ma le (1B) ia Novema 2021, ae pe faamata sa iai se malosiaga i le Komesina o Faigapalota na ia faaogaina ai aiaiga o ia vaega o le Faavae i le taimi lava lea ina ua maea ai le faalauiloaina faalauaitele i le aso 29 o Novema o faaiuga o Faiga palota Laiti lea sa faia ia Novema 26.
Na faailoa e le itu tagi o lea sa iai tagi e lua o le faigapalota laitiiti, ma sa iai pea lava mai ia Novema 2021 seia oo mai ia Mati o le tausaga nei ona e lei faia se faaiuga a le Faamasinoga Maualuga e aveesea aloaia ai ia tagi e lua. O le tulaga lea ua le talafeagai ai ma le faaiuga a le Faamasinoga Apili, i le mataupu i le Va o le FAST ma le Komesina o Faiga Palota 2021 ona o lea e leo talafeagai le taimi na fai ai le faasilasilaga a le Komesina atoa ai ma le faalauiloa o le filifilia o Sui Tamaitai e toalua o sui faaopoopo i le Palemene.

Ua ia faia e aunoa ma se malosiaga e tatau ai, lona faaogaina o le 44 (1A) ma le (1B) ma faalauiloa ai faaiuga o le FaigaPalota laiti e 6 i le aso 26 o Novema, 2021, atoa ai ma le faalauiloaina o le filifilia ai o sui tamaitai e toalua o nisi sui faaopoopo i le Palemene, ma tuuina atu ia faaiuga e saini e le Ao o le Malo i aso 29/30 o Novema.

Ua faaalia e le Itu Tagi o ia vaega uma ua le talafeagai ma e le masani ai, ma ua iloa o se mea ua faia, ma faatupu ina ua tatala pusa palota e le Ofisa o le Komisi o Faigapalota i le Aso Toana’i 27 o Novema e aunoa ma le siafia e sui tauva faapea failautusi. O lea faiga a’o lumanai ai le faitauga aloaia ma le faalauiloaina o le faaiuga i le Aso Gafua 29 o Novema, 2021.

O loo faapea mai le Itu tagi o lea gaioiga a le Komesina o Faigapalota ua faatupu ai le le fiafia i itutagi, aemaise ai le tulaga tonu faatatau i palota e 12 a Toomata na aveesea e le Itu tali Muamua (Komesina O Faigapalota), a’o loma ai le Faiga Palota Laitiiti ia Novema 2021. O lea faiga na mafua ai ona pau pasene o palota a To’omata ma faaleaogaina ai le faaono tulaga lua i sui tamaita’i na tauva, ma pau atu ai loa i le tulaga tolu.

Ua taua fo’i i le finauga a le Itu Tagi o le tulaga faapea foi na tulai mai i le Itu Tagi tolu ia Lolomatauama Eseta Mataituli lea foi sa maua le tatalaina o pusa palota e aunoa ma le auai ai o le sui ma ana failautusi. O lea tulaga na tulai mai ai le faaitiitia i le 19 palota a Lolo mai le na manumalo i le faiga palota laitiiti. Ua taua foi sa fesiligia foi e Lolo le tulaga i le agavaa o le silia i le 200 o tagata palota i le lola a lona itumalo o Aana Alofi 2, peitai e lei iai lava se galuega na faia iai a le Ofisa o Faigapalota, pe na amanaia fo’i lea talosaga.

Ua taua o ia tulaga na faatupu ai le masaloga ma le le mautonu i le faamaoni o le Ofisa o le Komisi o Faigapalota, e ala i le aufaigaluega faapea ai le Itu Tali Muamua le sa avea ma Komesina o Faigapalota. O lea faiga ua atili ona masalomia ina ua tuuina mai le faaiuga eseese e lua e le Itu tali Muamua, ma sainia e le Ao o le Malo i le aso 29 ma le 30 o Novema, 2021.

Ua failoa foi e le Itu Tagi ua faatupulaia le tele o mataupu ua faatulai mai lea taimi i le fua (formular) ma fesiligia ai loa le sa’o ma le tonu o le faitauina o palota. E atagia lea i le eseese o faaiuga i pasene a le Itu Tagi Muamua (To’omata). Na faaalia sa uluai faalauiloa le 36% a To’omata mulimuli ane toe pau i lalo i le 35.45% atoa ai la ma le aunoa o se faamalamalamaga o le 12 palota ua aveesea mai i palota a lea sui.

O lea faiga na pau mai ai loa le tulaga o Toomata mai le lona lua i le lona tolu mai i sui tamaita’i ae avea ai loa le sui o le HRPP mai Aleipata Itupa i Lalo ma sui lona lua.

O le isi tulaga na faailoa e Taulapapa o loo aafia ai le vaega 15 o le faavae lea e talanoa mai le Saolotoga mai Tulafono Faailoga Tagata, e manatu ai o loo iai aafiaga o le faaogaina o le tulafono 44(1B) o loo Faailoga tagata lea pe a fua i le Veaga 15 o le Faavae.

Na faailoa o le tulaga lava ia pe a tuu atu i le vaega o le Tulafoo 44(1B) (b) o le Tamaitai lava ia e maualuga le numera o ana palota e tatau ona avea ma sui faaopoopo e tusa ai o le (1A). Ona toe faamatalaina mai ai loa lea o le numera maualuga lea o palota a se tamaitai i vaega faaopoopo o le 44(5) lea o loo faapea mai o le pasene o le tuufaatasiga o palota faaogaina ise itumalo mo le sui tamaita’i.
O loo faapea mai le Itu Tagi e faailogalanu le fua lea ma le calculation pe a tuu atu i le eseesega o itumalo, ua le mafai ai e le fua lea ona ia faapaleni aafiaga nei i itumalo faapalota. I le tulaga o le fua lea i pasene maualuga o palota o Tamaitai mai itumalo laiti pe tauva fo’i ma se sui e toatasi, e tele le avanoa mo i latou nai lo tamaitai mai Itumalo tetele, ona o le eseesega i le numera o tagata palota ma sui tauva mai ia Itumalo.

Ae o Itumalo tetela foi o le a mafai ona maualuga le avanoa mo le toatele o matai tamaitai e tauva, ua faailoa ai o nei vaega o le tulafono i lona tulaga eseese ua le ausia ai le faamoemoe na fausia ai ina ia unai le numera tele o tamaitai i le Palemene, ae ua faailoga lanu e ala i se numera tele o tamaita’i faavae lea i luga o tulaga amanaia, o nofoaga na soifua ai, o le siosiomaga e agai mai ai i lona fesootai atu i ituaiga Itumalo o loo avea ai i latou ma sui.

O loo faapea mai foi le finauga a le Itu tagi e tusa lava fo’i pe faaogaina le numera o palota nai lo le pasene e iai lava aafiaga o le veaga lenei o le tulafono i sui tamaitai ona o le a tele le avanoa o Tamaitai mai Itumalo tetele nai loa tamaitai i itumalo laiti.

ITU TALI :

O loo faapea mai itu tali o loo manino lava le uiga o le faaupuga i le tulafono o le “numera maualuga o palota” ma i lena uiga o le “pasene lava lea o palota na maua e le sui tamaitai agai i le numera o palota i lona itumalo”

O loo faapea mai e leai ni mau uiga eseese ma feleiloga’i o iai. O le tofiaina e le Komesina o Faigapalota o Tamaita’i e toalua i le maea ai o le Faigapalota o loo faatulafonoina lava ma mulimulita’i foi i le faaiuga a le Faamasinoga o Apili i le mataupu faatatau i le 10% o Tamaita’i i le Palemene.

O loo faapea mai fo’i o tagi e lua na toe ave i tua o lona uiga o loo talafeagai pea le tofiga na faia, ma e le mafai ona teena pe fesiligia fo’i. Aemaise ai la e leo iai se vaega o aafia ai le Vaega 15 o le Faavae i le Vaega 44 o le Tulafono e pei ona finau atu ai le Itu Tagi, peitai o loo taoto lelei lava ma talia i lalo o le Vaega 15 o le Tulafono.

Na faailoa e Aumua Ming Leung Wai e faapea sa iai se mea na sese i se tasi o vaega o le Tulafono o Faigapalota lea sa tuuina i totonu o le Faasilasilaga na saini e le Ao o le Malo i le aso 29 lea na mafua ai ona faia le faasilasilaga lona lua i le aso 30 o Novema 2021.

Na ia faailoa foi, ina ua fesiligia e le Faamasino Sili po’o le a le eseesega o le numera maualuga o palota ma le uiga o le pasene o le tuufaatasiga o Palota faaogaina, i sana fauigaga. E pei ona tuuina atu ai se faataitaiga mai le Faamasino Sili i le ausia e le isi sui o le 1000 palota ae o le isi na’o le 200, ma faapea mai ai le Faamasino Sili i le mafaufauga foi lea, o le tagata maualuga palota o le ua maua le 1000, peitai e leo lena le tulaga e tusa ma le fua ma le calculation.

Sa tali mai Aumua o le Vaega 44 (5) o loo manino lava peitai o le tulaga lava i le sitaili o le tusiaina o le tulafono (drafting style) ia poo se faapu’upu’uga (shortcut) o le tulafono.

Sa fesiligia fo’i Aumua e le Alii Faamasino Sinia ia Vui ma ia faapea ai, pe faafefea la ona fai pe afai e na’o le toalima lava tamaita’i, ma e le’i manumalo uma i le palota, pe faamata e toe fai se isi faigapalota faapitoa ina ia faamalie ai vaega o le tulafono.

E le gata i lea sa tuuina atu foi ia Aumua pe na te silafia e tusa ai o teuteuga ua faia i le Faavae, pe nai iai lava mai le amataga le vaega 44(5), pe faatoa tuuina iai mulimuli ane e le Palemene…. ae na tali mai Aumua sa iai lava i le amataga.