Ua tolu feiloaiga a taitai o faigamalo a Samoa e lua i le fono o le Atoa o Samoa talu ona filifilia le faigamalo fou a Tutuila ma Manu’a faapea Samoa Tutoatasi, ma ua faamautu ai nisi o maliega i tulaga i pemita malaga e ulufale ai tagatanuu o Samoa i le teritori.
O le pepa o faamaumauga o iugafono ua saini aao ai le Palemia o Samoa ma le Kovana o Amerika Samoa, ua faailoa ai le talatala o nisi o aiaiga.
Ua amata i se tulaga faataitai poo se trial, le malaga atu o tagata mai Samoa i le teritori mo le umi e fitu aso e aunoa ma se pemita.
Tāua tele malaga nei pe a fua atu i lea suiga i se tulaga o loo faata’ita’i mo i latou e fia ulufale i Tutuila ma Manu’a ona o ni mataupu faavavave e pei o fonotaga, faatauga, feiloaiga faaleaiga, poo se faalavelave e pei o se maliu poo se faaipoipoga.
O le pemita 30 aso e malaga ai i le teritori mo tagatanuu Samoa e le o toe manaomia se kilia o le soifua maloloina pe afai e leai se faamoemoe e nofomau pe faigaluega.
O le lipoti foi mai leoleo sa aiaia mo lea pemita ua faatasi lava ona faia mo le tausaga atoa, ae le toe faia e pei ona sa iai, o le malaga lava i le pemita 30 aso pe faafia i totonu o le tausaga e manaomia lava le lipoti mai leoleo.
O lafoga totogi i le malaevaalele mo tagata malaga mai Amerika Samoa, e le toe faia le tulaga sa iai o le faatoa totogi pe a malaga ese ma Samoa, ae o le a aofia lea tupe o le lafoga i le pasese o le vaalele.
O lona uiga e na ona mae’a lava ona siaki o tusifolau ma uta, faatali loa le taimi e talaaao ai i le vaalele.
