O le faaiuga o le vaiaso nei e taaalo ai le ‘au a tamaitai a Tonga i le taaloga lakapi ma le ‘au a le Manusina Samoa e talamalae i le fetauiga a le Moana Pasifika ma le Melbourne Rebels i Mt Smart.
Fai mai le RNZ o le taaloga lea a ‘au a tamaitai mai Samoa ma Tonga o le a faaaoga foi e fili mai ai a la ‘au e taaalo i le Oceania Rugby Women’s Championships ua fuafua mo le masina o Me.
E manatu le pule o le ‘au a Tonga o Haissane Vaihu o le faia o taaloga faapea faavaomalo o le auala lea e faailoa atu ai tamaitai taaalo i isi siomaga tetele faapea, ma a’oa’oina ai foi nisi mea fou mai isi au.
Na faailoa foi se faamatalaga mai le Ofisa Sili o le Moana Pasifika, Pelenato Sakalia e mitamita i le taaalo a ‘au ia e lua e talamalae i le latou taaloga.
O le fetauiga talu ai a ‘au ia e lua i le 2022 na malo ai Samoa i ‘ai e 25-17 i se sikoa na toe maua o le a uma le taimi faatulagaina o le taaloga.
