O suiga lava i le tau le mataupu o le a laualuga i le talanoaga muamua a taitai o le Pasefika ma le malo tele o Amerika lea ua faataunuu i le taimi nei i Uosigitone i Amerika.
O le fonotaga lona 77 a Malo Aufaatasi sa faataunuu i Niu Ioka i le vaiaso talu ai na valaau ai taitai o le Pasefika i atunuu tetele o le lalolagi ina ia faaitiitia le tulaga o kasa oona e faamatuu agai i le siosiomaga ma ia silasila foi i aafiaga o le tau.
Sa saunoa ai le faatonu mai le Sprep, Tagaloa Cooper e manaomia le faatino e atunuu tetele nei o nisi gaioiga faaopoopo e fesoasoani ai i le faaitiitia o aafiaga o le tau.
O Novema o le tausaga nei e faataunuu ai foi le isi fonotaga a Malo Aufaatasi le UN Climate Change Conference, COP27 e talimalo ai le atunuu o Aikupito.
I le saunoaga foi a le Palemia o lo tatou atunuu, Fiame Naomi Mataafa i le fonotaga lea a Malo Aufaatasi sa faamamafa ai le tulaga lea i suiga o le tau o loo ave iai le faamuamua a Samoa.
