O loo tau faamautu lava e leoleo pe faamaonia o le faalavelave lea na fanaina ai se tagata i fafo ane o se faletoleni i le itu i Saute i Sisifo o Sini, o se faalavelave e foliga e sese le tagata na fuafua iai le osofaiga. 

O Taha Sabbagh sa taumafa lana kofe i le nofoa o le avetaavale o lana taavale o le mercedez ae fanaina ai e le tagata i Sefton i le ‘afa o le ono i le taeao ananafi.

Fai mai na momo’e si ona atalii mo se fesoasoani ae na maliu ai lava i fafo ane o le faletoleni lea si alii na fanaina e 40 tausaga le matua ma faia loa iai suesuega.

Fai mai leoleo o se tulaga faanoanoa tele lenei mo le atalii o lē ua aafia lea e na o le 12 tausaga.

Fai mai leoleo o loo faia nei le suesuega pe iai se sootaga o le faalavelave lea ma lē ua maliu pe o se tulaga ua sese le tagata sa fuafuaina iai le osofaiga.

E manatu leoleo pe toalua ni tagata o loo aofia i lenei mataupu, ae ua ono nei masina talu ona mae’a le faalavelave na maliliu ai foi ni tamaitai se toalua na tafana e se tagata i Reevesby.

O loo faia pea suesuega.