I le 103 o i latou na faauuina i mataupu na aotauina ai i le 6 masina, e silia ma le 50 tamaitai ua faapea ona faauuina ai mai le aoga a Ausetalia poo le Australia Pacific Training Coalition(A.P.T.C.).
O lenei sauniga sa molimauina e aiga ma uo i taumafaiga a le vasega faauu ua faamanuiaina.
O le Minisita o Aoga, Afioga Seuula Ioane Tuaau sa saunoa e momoli le agaga o le faamalo i le vasega faauu aemaise ai o le vasega o tamaitai ua faamanuiaina ae faapea ai le aoga a le A.P.T.C. e tusa ai o le mae’a ai o aoaoga sa feagai ai.
“O le agaga faafetai i le tala ua auina mai e tele le fuainumera o tamaitai o loo filogia ai i le vasega faauu i mataupu tau faufale, faakamuta ma nisi.
“O tomai nei e pei ona lausilafia ai sa tele ina malosi ai i le itupa o alii ae peitai o loo ua vaaia le siitia ai o le numera o tamaitai o loo ua aotauina ma iai le fiafiaga i nei matata.
“O lea e faafetaia ai le Malo o Ausetalia e tauala mai i le A.P.T.C. e tusa ai o le feau e unaia ai tamaitai ia aua ne’i gata ai i mataupu masani ae tauivi e siitia le tomai i matata faapenei.
“Faafetai i le lagolagoina o alafua ma fuafuaga a le Malo e ala i ana taiala mo aoaoga mo le lumanai manuia o o tatou tagata.”
O loo vavalalata le faigapaaga a le aoga lenei a Ausetalia ma le Pulega o Tusipasi ma Faailoga Taualoa a Samoa ina ia faamauina nei faailoga o loo maua e o tatou tagata ma amanaiaina e faaaoga i soo se galuega i le atunuu.
“O lea ua mae’a le isi vaega o le ola taumafai o le isi laasaaga o le faaaogāina o lo outou tomai ma agavaa mai aoaoga sa outou feagai ai e tautua ai si o tatou atunuu i ana atina’e auā lo tatou tamaoaiga aemaise o se ‘ai i le tapuaiga a mātua ma aiga aemaise nuu ma Ekalesia.”
O le faamalosiau mai le Minisita, “Ia aua ne’i gata ai le ola aoaoina o loo iai foi nisi avanoa e toe suesue ma toe faalauaitele ai le poto salalau auā o outou o lumanai ia o Samoa ma lona atinaeina.”
O se tasi o sui faauu Kereta Samia na saunoa e fai ma sui o le vasega faauu e molimoli se faafetai ia i latou sa lagolagoina foi le taumafai ma le savaliga sa feagai ai.
“E le o se savaliga faigofie e faamata e faigofie i le vaai ma le maitau ae o se taimi faigata mo i matou ona o le taumafai ia fuafuaina le taimi o a matou galuega ma le taimi o aoaoga.
“Ae lei lagona ai le faavaivai i le vaai atu o loo faamalosiau ma tapuai mai a matou fale faigaluega ona o le manatu ina ia manuia o matou faiva ae a le tapuaiga a aiga nuu ma Ekalesia sa tatalo ma faanonomanu a o alo faiva i matou i aoaoga.
“Faapito se faafetai i le Malo o Ausetalia ona o le agalelei i nei avanoa lē aumaua ua o matou maua i le fesoasoani mai i le ola taumafai ae le gata i lea o le Malo o Samoa i le unaia pea ma le logologo pea o le tāua o le ola aoaoina auā e le taumate lona taunuuga lelei.”
Ua silia ai ma le 2000 alo o Samoa ua maea faauuina mai i lenei polokalame faatasi ai ma le 19,000 o i latou mai le Pasefika sa manuia ai.
O lenei faamoemoe sa faatautaia lea i le fale taalo ale Iunivesite Aoao o Samoa.
