I faamaumauga mai le Ofisa o Fuainumera Faamauina mo le masina o Oketopa o le tausaga nei, e silia ma le 18 afe tagata na faimalaga i le atunuu e tusa ai o pepa faatumu a tagata e malaga mai i le atunuu mai le malaevaalele faavaomalo i Faleolo, malaevaalele i Fagalii ma le uafu i Matautu.
O lenei fuainumera o loo atagia ai le faaitiitia i le 9 pasene mai le fuainumera o tagata e ulufale mai i le atunuu i le masina o Setema o le tausaga nei.
E 13,383 le fuainumera faamauina mo i latou o loo asiasi mai ma o loo faaitiitia foi lenei fuainumera i le 11.2 pasene talu mai le masina o Aokuso, o nisi o loo maua ai le fuainumera atoa mai tagata malaga i le masina o Oketopa o i latou o loo malaga mai i fonotaga ma taaloga.
O loo faatumauina pea le toatele ai o tagata e malaga i le atunuu mai Niu Sila e tusa lea ma le 43.9 pasene, sosoo ai ma Ausetalia i le 26.9 pasene faapea ai ma se toaitiiti o pasene mai Amerika, Amerika Samoa faapea ai ma nisi o atunuu.
E maualuga pea le pasene o i latou o loo faaaogāina femalagaa’iga i le ea i le 92.8 pasene ma le 7.2 pasene o i latou o loo malaga mai i le vasa.
