I le amatalia ai o tapenaga ma faamoemoega uma a le ‘au fili a alii a Samoa mo le ipu o le Oceania mo le taaloga soka i Fiti (OFC Men’s Cup 2024), faamauina le lava tapena o alo ma fanau o le atunuu.
I se faatalatalanoaga a le faiaoga ulu o le ‘au a alii, Ryan Stewart, o le alii kapeteni ia Andrew Setefano ma sui au faasalalau na faasoa ai le alii faiaoga ua sauni Samoa e iloilo ma le ‘au malosi a Tahiti.
E ui ina ta’ua e le faiaoga ia Ryan le manu’aga i le vae a se tasi o alii taalo ae faasoa Ryan o e le o i se tulaga tuga.
Faasoa le faioga o le ‘au a Samoa, e ui i le utiuti o le taimi na taumafai ai le ‘au e tuufaatasia tama taaalo mai atunuu eseese aemaise tama o loo taaalo faaavaomalo ae na mafai lava ona galulue faatasi mo le taamilosaga.
Ae i le tau tuufaatasia ai o lenei ‘au a Samoa, faamanino e le faiaoga ulu o tama o loo fai ma ave fu’a o le atunuu o tama fanau a Samoa o loo aumau i Samoa faapea atunuu e mamao.
E le o se taaloga faigofie le taaloga muamua ma Tahiti, ae ina ua fesiligia le faiaoga ma le alii kapeteni ia Andrew Setefano i auala ma fuafuaga o le a tepataula’i iai le ‘au mo lea taaloga, ta’ua e i la’ua nei o le a taumafai lava e agai tonu i a latou tapenaga ma gaioiga na galulue ai mo lea taaloga.
Ta’ua e i la’ua nei le telē le suiga ua iai tapenaga a Samoa, ina ia tau lau o le faamoemoe.
O le aso a taeao le Aso Sa 16 o Iuni i le toe 15 minute i le 1 o le a taaalo ai Samoa ma Tahiti i Suva i Fiti. Ma o le faasoa a le alii kapeteni ia Andrew Setefano, ina ia manatua pea le ‘au i le tapua’iga ma le lagolago a le atunuu.
