O se faamanuiaga tele lea i le nofoaga o loo toomaga atu iai le toatele o i latou o loo sauaina lea na oo atu ai sui o le Faith City Liverpool mai Ausetalia.

E tusa ma pepa o faamatalaga e $5000 le tinoitupe na foaiina i le Peresitene o le Toomaga, Siliniu Lina Chang faatasi ai ma le container e tumu i meatotino eseese e faaaogā e fanau ma tina o loo nofo vaavaaia ai i le nofoaga a le Toomaga.

Na mafai foi ona maua le avanoa e faasoa ai ma ave se upu faamalosi ia i latou sa sauaina i latou o loo i le Toomaga ma na ta’ua ai e le Failautusi a le Ekalesia, Asiata Lagolago le uiga o le oo atu i le nofoaga ma se fesoasoani.

“O nei mea uma e le o ni a matou galuega, ae o galuega a le Silisili Ese ma ua na o se amataga ma e ao ina tatou faalagolago i le Alii tatou te toe maua ai mafutaga faapenei.”

Na faailoa e le susuga i le Faafeagaiga ia Sinuu Talagi o le a silasila mai lava i lenei nofoaga mo fesoasoani.

“Sa tele ina alu a matou misiona i West Papua, Indonesia, Filipino ae ua matou lē toe tilotilo la i se isi mea ae ua taulai mai loa le vaai i si o tatou atunuu.

“Ua matou vaavaai i le tulaga manaomia e o tatou tagata o le fesoasoani ma e matou te toe omai i se taimi o i luma.”

Na momoli le agaga faafetai a le Toomaga i le Ekalesia e tusa ai o le agalelei ua latou taulimaina e fesoasoani ai i le tausiga o fanau ma tina o loo nofoia le nofoaga a le Toomaga.