E 3 tausaga ua tapu pe faasā ai ona toe umia e le tamā 70 tausaga le matua o Edwin Sinclair o Vaivase se laisene avetaavale, ma faasā ai foi ona ia toe ave se taavale, ina ua faamaonia lona moliaga o le avetaavale faatamala na fano ai le ola o se tamaitiiti e 2 tausaga le matua.

Ua faasala tupe ai e le faamasinoga lea tamā i le aofa’iga e sefulu afe tala.

E lima afe e totogi i le tuaa tinā o le tamaitiiti na maliu i le faalavelave ma le isi lima afe tala o le sala e totogi i totonu o le 28 aso, a lē usitai iai e faasala i le 6 masina i le falepuipui.

Ua faaopoopo iai ma le 150 itula e galue fua ai mo le lelei o tagata lautele.

O loo fua lenei faasalaga i itu lelei mo lē ua faasalaina e pei o le lua afe tala ma le ietoga na ave e lona aiga i le faatoesega i le aiga o lē na maliu, faapea le 10 afe tala sa tuuina atu e fesoasoani ai i le maliu o le tamaitiiti na fano le ola i le faalavelave.

Sa tetee Edwin i moliaga a leoleo ae na faamaonia ina ua mae’a ona su’esu’eina molimau.