I le masina o Mati o le tausaga e 2021 na sainia ma faamautū ai le mauaina e le pisinisi o le Princessa, o se faleoloa supamaketi se nonogatupe e 4 tesimale 6 miliona tala mai le faalapotopotoga o le faaputugatupe o le lumana’i manuia o tagata le NPF.
E oo mai i le taimi nei ua silia ma le 7 miliona tala o loo nofo aitalafu ai lea pisinisi i lea faalapotopotoga a le malo.
Ua mafua ona oso maualuga le aofa’iga o le aitalafu ona ua faaletonu le toe totogiina.
E to’alima i latou ua faatūtū iai le tagi a le NPF mo le toe tototogiina o lea aitalafu tele, o le pisinisi o le Princessa o lona nofoaga autū o loo i Siusega, ma tagata faipisinisi o le kamupani e to’alima.
O le to’afā o i latou o tagatānuu o Saina ma se tamaitai Samoa e mau paolo i se tasi o lea aufaipisinisi.
O i latou foi ua molia e le NPF ua aofia ai le tamaloa Saina o lona atalii sa faaipoipo i le tamaitai Samoa ua molia ai foi, i lona saini ai i le nonnegative.
O lea tamaitai e pei ona faailoa i pepa o faamaumauga a le faamasinoga, o loo ia teena lona silafia o se mea e tasi faasino i le aitalafu, ma ua ia faailoa ai i ia faamaumauga o ia sa faaaogā e le alii Saina sa la nonofo e una’i ai le faagaioia o le pisinisi mai le amataga.
O loo faailoa e le tamaitai sa leai se faamalamalamaina atu e tagata faigaluega o le NPF sa gafa ma le faagaioia o le nonogatupe o pepa sa tuuina atu na te sainia.
O le Aso Gafua o le vaiaso nei sa valaau ai mo le taimi muamua lenei mataupu tau faamasinoga, ma ua toe tolopo ona o loo iai nisi o tapenaga o loo fia tuuina atu e loia a le itu tagi ma loia a itu o loo faasaga iai le su.
