E iai nisi Iunivesite ua toe foi lava i le faia o suega faaaoga ai pepa ma peni aemaise i le suega o le faaiuga o le tausaga ona o le faigata ona faamautinoa o loo sologa lelei ma leai se faimamago e faia i suega e faatino i luga o upegatafailagi. Lipotia i le RNZ i le asō se faamatalaga a se tasi o faiaoga sinia i le Iunivesite o Aukilani Dr Ulrich Speidel e lē o lava gaioiga o faatino e Iunivesite e faamautinoa ai o loo saogalemu suega o loo faia i luga o upegatafailagi.
Na ia tā’ua e na te maitauina nisi o tulaga i faiga suega ma metotia a nisi tamaiti aoga e faia e lē faamaoni ai le faiga o suega aemaise lava i luga o le initaneti, auā e tusa lava pe fai mai e secure le wifi ma iai auala e puipuia ai peitai e mafai lava ona osofai pe hack e nisi ma iai foi nisi auala e faataamilo ane ai le osofaia o ia suega.
Fai mai Speidel e toe fia vaai a ia ua toe foi le faiga o suega i le faaaoga o le pepa ma le peni pei ona sau ai mai tausaga ua te’a, o le faiga aupito i talafeagai foi lea.
Puna o Faamatalaga: https://www.rnz.co.nz/news/national/530755/uni-exam-cheating-pen-and-paper-has-served-us-well-for-many-many-centuries
