O le fono a le kapeneta i le vaiaso nei ua fuafua e fofola ai se ripoti o le a faailoa ai mafuaaga o le faaletonu ua aafia ai le vaa leoleo o le Nafanua e pei ona pa’ulia i se vaega o le a’au lata i le ava e ofi atu ai vaa i le uafu Salelologa.

O le Aso Gafua na asia ai le ogasami o loo pa’ulia ai le vaa leoleo i le Minisita o Galulue Tetele faapea le Matagaluega o Alamanuia ma Leipa faapea ma faalapotopotoga tumaoti uma a le Malo.

Na asia ai foi e le Ofisa Sili o Matagaluega o Tetele a le Malo ma le Ofisa Sili o Pulega o Uafu i le fia silasila i le tulaga o loo iai le vaa aemaise o se taumafaiga e toso ese ai pe afai e manuia le taumafaiga e foia ai le faaletonu.

Na faailoa e se molimau faatuatuaina o loo silasila muamua i se taumafaiga e pamu ese ai le suauu o le vaa leoleo ina ia taofia nisi aafiaga o le ogasami pe a mama i fafo ia vaega, o aafiaga o le gataifale i figota ma i’a aemaise o isi meaola o le sami o loo naunau ia taofia. O le tala mai a le molimau ua tele se aafiaga o se vaega i lalo o le vaa  ona ua pa’ulia ma mau i luga o ‘amu tetele o le a’au.

E iai le talitonuga e faatino ai ma se suesuega e saili uma ai faamatalaga o le mafuaaga o lenei faaletonu e ala i se komisi suesue .

O le tausaga e 2019 na aumai ai lenei vaa leoleo fou le Nafanua II mai Ausetalia ina ua toe faafoi le Nafanua I i lalo o le polokalame fesoasoani a lea malo i vaega o puipuiga. O lenei vaa leoleo o loo feagai ma le leoina o le ogasami faatulafonoina a le atunuu ma faaoga foi i galuega laveai i taimi o ni faalavelave tutupu faafuasei.

Talu ona pa’ulia le vaa i le Aso Tofi na te’a nei e lei tuuina mai se faamatalaga faalauaitele a le Komesina o Leoleo ma Falepuipui  Su’a Fuiavailiili Egon Keil e ala i lea mataupu.

O le tau atoa o lenei meatotino a le Malo e $30 miliona tala ma lea ua telē lona aafiaga talu ai gaioiga mo le saogalemu mai ni vevesiga na ono tulai mai le solo a le HRPP i le motu tele i Salafai i le Aso Tofi na te’a nei.