O le mae’a o le faigapalota lona lua poo le run off election a le teritori o Amerika Samoa i le Aso Lulu o le vaiaso nei, o le Aso Lua 19 lea o Novema i Amerika Samoa, na molimauina ai i le tuu aofa’iga o palota le fulisia o le 50 pasene o tagata palota o le teritori e faia se suiga i ta’ita’i o lana faigamalo mo le tofi Kovana ma le Lutena Kovana.
O sui tauva e to’alua le afioga Pulaalii Nikolao Pula ma Pulu Ae Ae Junior na tulaga muamua palota na o la maua e 5,846 poo le 59.8 pasene, ae o sui tauva o loo tula’i i le tofi Kovana ma le Lutena Kovana le afioga Lemanu Peleti Mauga ma Laapui Talauega Eleasalo Ale e 3,925 a la palota na maua tusa lea o le 40.2 pasene.
E 9,971 le aofaiga o tagata palota na faia lea filifiliga.
Ua faailoa i lipoti mai le teritori o le faai’uga ua taunuu iai o se faai’uga e le’i aloa’ia pe unofficial, ae faato’ā aloa’ia pe a mae’a aso e fitu.
