O se tala faanoanoa i le tapuaiga a le atunuu aemaise o aiga le lipotia mai ai le maliu faafuasei o le faiaoga o le aufusu a Samoa i Farani i le faai’uga o lena vaiaso, a o lumanai le tatalaina o ia taaloga a le lalolagi.
Ua faailoa i se lipoti o se gasegase o le fatu na maliu ai le faiaoga le susuga Lionel Elika Fatupaito ua 60 tausaga o lona soifua.
I se pepa o faamatalaga mai le ofisa o le pulega o taaloga uma i le atunuu le SASNOC ua faailoa ai na maliu le faiaoga o le tatou au fusu i le nofoaga o loo faamautu uma ai autaaalo.
Ua faailoa ai e le Pelesetene o le Komiti o taaloga Olimipeka a Samoa le susuga Pauga Talalelei Pauga le ofoina atu o faamaisega ma faamafanafanaga i le autaalo uma a le atunuu aemaise o le tapuaiga a aiga ona o le tala faanoanoa.
O le ufitia ai o le aumasii a Samoa i le Olimipeka i lea tala faamomoi loto na feiloai ai le Pelesetene ma le ta’ita’i o le tatou aumasii ma le ‘au atoa ma ave iai faamalosiau ma fautuaga ina ia taulai pea le silasila ia latou tapenaga.
I upega tafailagi ua faailoa e le alii fusu mo le tatou ‘au i le Olimipeka le susuga Ato Plodzicki Faoagali lona faanoanoa i le maliu o lana faiaoga a o loma ana faipelega, peitai o le a silasila mamao pea ma tuli se ‘ai auā le tapuaiga a le atunuu.
Faaalia e Ato na amata ona la masani ma le faiaoga ua maliu ae faato’ā 15 ona tausaga, ae o lea ua faaauau atu le la mafutaga i le Olimipeka peitai ua momotu e le maliu ma le oti lea mafutaga i le taaloga o le fusu poo le faipele.
