E moomia ona faamatuu mai se isi power faaopoopo e le malo agai i le Auckland Council.
O le manaoga lea o le pulenuu o Aukilani, Wayne Brown a o fofola mai ai i le taeao ananafi fuafuaga o loo manao le Auckland Council ua tatau ona faia i totonu o le aai.
Fai mai Brown, o Aukilani o loo telē lona sao i le tamaoaiga, ma o le tele foi o nei tupe maua o loo alu agai i le malo ma e moomia ai la e le Council le finagalo malamalama o le malo e faamatuu mai ai le malosiaga faaopoopo e mafai ai lava e le Council ona faia faaiuga i nisi o mataupu tāua.
O le malosiaga o loo talanoa ai le pulenuu o le mafai lea ona faia lava e le Council o le tau e totogi mo parking fines, atoa ai ma le faatulaga o le tau e totogi mo le aafiaga o le ea.
E le gata i lea, ae o loo toe fia faaleleia foi le tele o meatotino a le Council lea ua tusa ma le 50 tausaga talu ona iai, ma ua moomia le toe fau.
E iai fuafuaga a le Auckland Council e pei o le Super City na tautau e lē o tupu, ona e lei ioe le malo.
