E tasi le molimau a le susuga Paepaetele Ernest Jnr e lagolago ai lana tali tetee i le moliaga a leoleo o lona faia o ni faasalalauga taufaaleaga sa ia tuua’ia ai se tasi sa avea ma komesina lagolago o le matagaluega o leoleo, lea sa avea ma sui fofoga fetalai o le Palemene, na faailoa ai e lē ua molia sa taumafai lē ua tagi e faamalosi se tamaitai leoleo.
O se alii leoleo satini sa molimau i le mataupu lenei i le Aso Lua ma ia faamatala ai le mea na tupu i le pou a leoleo i Faleolo i se vaitaimi o le tausaga e 2007. Na faailoa e le molimau o ia sa tiute ma le tamaitai leoleo ua taofia i se poloaiga a le faamasinoga ona faailoa lona suafa. O se taimi o le po i le 9 i le 10 sa tiute ai ma lea tamaitai leoleo i se malaga a le vaalele o le Air New Zealand.
Na mae’a le la tiute ona alu atu lea o lē ua tagi le susuga Talaimanu i le taavale a leoleo sa faaaogā e le ofisa o leoleo i Faleolo, ma aumai i la’ua ma momoli i le ofisa i Faleolo. Na taunuu le taavale ona fai atu lea o lē ua tagi sa vaaia le pou a leoleo i Faleolo e alu ese ma le taavale ae agai i le ofisa ae se’i talanoa i le tamaitai leoleo. Na faamatala lava le molimau a o tuu fesili le loia a lē ua molia sa faasuā’avā lē ua tagi, ma sa ia ta’ua ai foi i lana molimau, poo le 20 minute o matamata le la TV ma se isi alii leoleo o le latou tiute ae agai loa e vaai poo fea o iai le tamaitai leoleo, ma e fetaui le sau i fafo ma le ofisa ae la fetaui loa ma le tamaitai ua agai atu. Sa ia vaaia ua sui foliga o le tamaitai leoleo ma faamatala atu loa ma le mea na tupu.
Sa logo e le alii leoleo satini ua galue nei i le ofisa o leoleo i Lotofaga Safata lo latou ta’ita’i ma faatonuina ai loa e tapena ni lipoti tusitusia ma tuuina atu i le ofisa su’esu’e o leoleo i Apia. O ia lipoti ma faamatalaga e faatatau i le mea na tupu na ta’ua e le molimau sa tuuina atu i le vaega o amioga taualoa a leoleo poo le Police Professional Standard Unit mo se su’esu’ega. O lea su’esu’ega na faaalia e le alii leoleo satini i lana molimau na te lē iloa pe na faaauau, ae pe na faia foi ni moliaga.
O le aso 5 o le masina fou o Aokuso e faia ai folasaga faai’u a loia ona tālia ai lea o se faai’uga o moliaga e lua o Paepaetele Ernest Jnr. O ia moliaga e aofia ai lona faia o ni faasalalauga sese ma taufaaleaga ua aafia ai le tamaaliiaga o se tagata, ma le moliaga o le faatautee i leoleo.
