E lei tuanai atu se vaiaso na faia ai se galuega a le Matagaluega o Leoleo e faamalamalama le tulafono a Samoa i nisi o tagatanuu o Saina o loo aumai i Samoa ona o pisinisi ma isi mafuaaga, ae tulai mai le gaioiga solitulafono e aafia ai se alii Saina e fai lana pisinisi i Samoa, lea sa ia umia ai se laau malosi na ia faapapa ma faamanu’alia ai se alii leoleo.

O le Malu o le Malo na aafia i le laau malosi o se tasi o leoleo mai le ofisa i Faleata na tali atu i se valaau mo se fesoasoani i se vevesi faalotoifale i le va o le alii Saina na umia le laau malosi ma se tamaitai Samoa e faapea sa nonofo muamua ma le faipisinisi mai Asia.

E tusa ma le lima itula o faia feutanaiga a leoleo e faaaoga ai ni faaliliu upu ma le alii Saina faipisinisi i se taumafaiga e siilima ane i leoleo mo suesuega agai i le mafuaaga o le vevesi faalotoifale. Faaalia i lipoti poo le fitu i le afiafi o le aso Faraile na tea nei na faatoa malie ai lē na masalomia e tuuina atu lona tagata i leoleo talu mai le itula e 2 i le aoauli o le aso lea na tulai mai ai lea gaioiga solitulafono.

Na ave le Malu o le Malo na aafia lona ua i se pulufana i le falemai i Motootua mo togafitiga ma se taotoga e aveese ai le pulu o le laau malosi.

O le feiloaiga a leoleo ma nisi o le mafutaga a tagata Saina o aumau i Samoa na faaalia e le Matagaluega o se talosaga mai le ofisa o lea malo i lo tatou atunuu ina ia faamalamalama i o latou tagata a tatou tulafono e fesootai i lo latou puipuiga ma lo latou saogalemu ao aumau ai i Samoa.