E iai se alii ua molia e leoleo i Melepone e feta’ua’ina lona faasalalau o ni mea sa tapu’eina, recordings i le malaevaalele i Melepone.

Fai mai o le amataga o le masina nei na faia ai su’esu’ega a le Australian Federal Police i lipoti o se tagata o loo faalavelavegia ai le auaunaga poo le sootaga tau leitio i le malaevaalele.

E 45 tausaga o lea tagata ma sa su’e e leoleo lona fale i le itu i Matu i Sasae o Melepone ma maua iai ni leitio ma masini pu’eleo faapea ma telefoni feavea’i e lua o loo iai ni fe’au sa pu’eina e faailoa ai o loo iai se faaletonu pe ua manaomia se fesoasoani.

Ua molia ai nei la i moliaga e tolu o le faalavelavegia o fesoota’iga tau leitio ma se vaalele ma afai ae faamaonia moliaga e ono oo atu i le 27 tausaga e falepuipui ai.

Ta’ua e leoleo e matua’i ogaoga ia ituaiga gaioiga ona o le saogalemu o tagata e faaaogāina auaunaga tau vaalele ma o soo se tasi e taumafai e lamatia le saogalemu o le atunuu femalagaa’i e ala i ni auala taufaasese pe lē faatagaina foi e tatau ona ave i le tulafono.

O le asō e tula’i ai lē ua molia i le faamasinoga. 

Puna o Faamatalaga: https://www.9news.com.au/national/man-charged-for-allegedly-broadcasting-chants-false-maydays-at-melbourne-airport/5598d5a3-b382-427e-b593-5053cb5e43fe