Ua silia ma le 100 kilo o fualaau faasāina ua taofia e le Australian Federal Police ma le Border Force mai le aumaia faananā i totonu o le atunuu.

Fai mai e to’alua ni tamaitai, 21 tausaga o le isi mai Niu Sa Uelese ma le 23 tausaga mai Niu Sila o loo tuua’ia i le taumafai e aumai faananā le 52 kilo o le ‘aisa i le malaevaalele faavaomalo i Sini i se malaga mai Singapore i le Aso Gafua o le vaiaso nei.

O fualaau faasāina ua teu lelei mai i totonu o ni afifi e 52 ua tusi ai le igoa o ti mai Saina, fai mai e ta’i kilo le mamafa o le afifi e tasi.

I se isi foi mataupu faapea i le Aso Lua o le vaiaso nei lava i le malaevaalele i Melepone na maua ai e le Border Force poloka e 12 ua feta’ua’ina o fualaau faasāina o le cocaine, e 26 kilo le mamafa ma sa afifi i le carbon paper ma tuu i totonu o se atopa’u a se tasi o pasese.

E to’alua tamaitai mai Peretania ua molia ai i le mataupu lea ina ua taunuu mai i Melepone i se malaga mai Mexico.

O le isi tamaitai e 20 tausaga na toe tatala i tua ae o le isi e 33 tausaga ua molia i le aumaia ma le umia o fualaau faasāina.

O le faasalaga aupito ogaoga o ia ituaiga soligatulafono o le soloatoa i le falepuipui.

Puna o Faamatalaga: https://www.google.com/amp/s/amp.9news.com.au/article/eb177743-2fb8-4e3e-bd37-a70f42b54403