Ua faamaonia mai e le komesina o leoleo a Niu Sa Uelese, o Karen Webb o le tagata e ana le caravan lea na maua iai totonu le tele o mea faapāpā e iai se lamatiaga i tagata, ua taofia nei e leoleo i se isi mataupu ese.

Ua ta’ua i le 9News o le caravan lea sa maua i le pito o le alatele i Dural i le aso 19 o le masina nei lava, maua e se tagata o le atunuu ma logo ai loa leoleo.

Fai mai ua tele vaiaso na vaaia o lafoa’i ai i le pito o le auala lea o Derriwong.

Ua faailoa faalaua’itele lea lipoti i le aso ananafi ina ua alia’e lipoti mai nisi o ofisa faasalalau.

Ua tula’i mai i se taimi o loo feagai ai foi leoleo ma le su’esu’ega o osofa’iga faasaga i tagata Isaraelu aemaise tusitusiga i luga o se a’oga Isaraelu i le itu i Sasae o Sini.

Fai mai o explosives sa maua i le caravan e aofia ai ma a’upega e mafai ona faatino ai se osofa’iga e aafia ai ni tagata se to’atele e ui fai mai leoleo o loo iai faailo e foliga sa fuafua ia a’upega mo le faaaogāina i se osofa’iga faasaga i tagata Isaraelu.

Ua iai tagata ua pu’eina i le mataupu lea ma ua faailoa ai e le komesina na te faamaonia o le tagata e ana le caravan, lea o loo taofia nei i se isi mataupu ese mai ma ua faaitiitia foi se lamatiaga i tagata lautele.

A itiiti mai pe 100 malu o le malo ma tagata su’esu’e mai isi ofisa o loo galulue i le su’esu’eina o le caravan lea ma ua poloa’ia foi le faia o su’esu’ega i nisi o nofoaga.

O se tasi tulaga o loo su’esu’eina pe sa iai se fuafuaga e faatino se osofa’iga faatupu faalavelave e faaaogā ai a’upega sa i totonu o le caravaan.

Puna o Faamatalaga: https://www.9news.com.au/national/explosives-caravan-dural-arrests-made-police-investigation-underway-antisemitic-terror-fears/a272d1e9-fa12-472a-b9cf-fb9c5ddc7019