O le feiloa’iga mulimuli a tusitala ma sui o le komiti faufautua mo galuega fesoasoani i taimi o faalavelave faafuase’i matuiā, na faailoa ai e le Ofisa Sili o le faalapotopotoga o le malosi tau eletise, e ui ina toe sologa lelei le auaunaga mo le motu o Upolu talu mai faaletonu sa aafia ai nisi o afi ma uaea malolosi tau eletise, ae e lē o mālōlō ai le aufaigaluega i le mata’itū pea o le auaunaga mo le atunuu, ona ua mātauina le siitia pea o le mana’oga tau eletise ona e iai nisi o galuega tau le tamaoaiga o loo faatino.
Le afioga Faumui Iese Toimoana o le Pule Sili o le faalapotopotoga o le malosi tau eletise le EPC.
O galuega faaleleia o lea auaunaga e pei o le suiina o pou molī sa mafua ai ona motusia le eletise i le vaveao o le Aso Tofi nei i Samoa mai Sogi aga’i atu i Mulinuu, ae o Siusega na motusia le eletise i se taimi o le aoauli o le Aso Lulu ananafi ona sa faaleleia le tulaga o loo tuu ai se transformer i luga o se tasi o pou molī.
E ese mai ia galuega faaleleia na mafua ai ona motusia le eletise, ae ua lē o toe iai se aafiaga tele o lea auaunaga mana’omia i le motu atoa o Upolu.
