O se vaaiga faafuase’i ma le matautia na tulai mai i le aso ananafi ina ua faafuase’i ona lagona le pāpā o se fana ma vaaia ai lē na avea ma peresitene o le malo tele o Amerika i le paeaiga talu ai, ua peiseai e pupuni lona taliga taumatau, ae oo atu loa ma nisi o leoleo nanā o le saogalemu ma taumafai e faamalumalu Trump ma pupuni ifo i lalo a o vave ona lolofi uma atu isi leoleo e si’o le vaega tonu o le fata o loo tu ai Trump.
O lenei faalavelave na tupu i le aso ananafi a o amata ona tulai Trump e lauga i se potopotoga tele o tagata e lagolagoina o ia i le nofoaga e ta’ua o le Butler Farm Show Grounds i le aai o Pennsylvania, o se aai i le itu i sisifo o le setete pe tusa ma le 56km (35 maila) o Matu o Pittsburgh.
O lea potopotoga lea sa faatalitalia e le motu o tagata na lolofi atu e faasilasila ai e Trump le suafa o le isi tagata lea o le a la toalua e tauva soosoo tau’au mo le sailia o se peresitene o Amerika i le isi faigapalota o le a sosoo nei.
Na vave gaioiga a leoleonanā mo le saogalemu i le puipuia o Trump i le lolofi atu ma si’o Trump ina ia pupuni mai le toe aliali atu o lona tino i fafo peitai na vaaia lava le taumafai o Trump e tilotilo a’e i luga ma sii malosi lona lima e u’u lana moto e faamalosi mai i tagata lagolago uma sa laulaututu ma o latou foliga atuatuvale.
E tusa ai ma lipoti mai le au faasalalau i Amerika, ua faamaonia mai ua uma le ola o le tagata na taumafai e fana lē na avea ma peresitene, faapea ma se tasi o tagata sa iai tonu i le nofoaga na tupu ai lenei faalavelave, ae o loo iai i le falema’i se tasi tagata i ni manu’aga ogaoga.
Na vave ona tulai mai le Peresitene o le atunuu, Joe Biden e faaleo lona agaga faanoanoa i le faalavelave ua tulai mai, ma ia ta’ua ai e matuā leai leai lava se avanoa i totonu o lona atunuu mo ni uiga sauā faatupu faalavelave faapea, ma sa ia matuā ta’usalaina ai nei uiga ua faia i se tasi o ta’ita’i o le atunuu.
O nei lava lipoti o loo ta’ua ai o le tagata lea na taumafai e fana Trump, e lei iai i totonu o le nofoaga sa tumutumu ai le rally, lona uiga e lei ui atu i le vaega sa suesue uma ai mo le saogalemu tagata na auai atu, ae foliga mai sa fā’ata mai lana fana mai luga o se taulaga o se fale na latalata ane.
I nisi lipoti o loo ta’ua ai e foliga e toalua ni tagata na taumafai e fana ane Trump, ae e lē o matuā mautinoa mai na lipoti.
I se lipoti lata mai anapo, na ta’ua ai ua faailoa mai e le FBI le igoa o le alii talavou e 20 tausaga o Thomas Matthew Crooks, o ia lea na taumafai e tagatavaleina lē na avea talu ai nei ma Peresitene o le Iunaite Setete o Amerika, Donald Trump ma ua maliu ina ua fanaina e se tasi o leoleo.
O loo faasolo pea la suesuega a leoleo i lenei faalavelave, ma saili poo le ā tonu le mafuaaga ma le uunaiga o gaioiga a lea tagata na mafua ai ae pe iai foi ni ona sootaga ma nisi faiga poo ni vaega faatupu faalavelave.
Na ta’ua foi i lipoti, ua ave foi se faaaliga i isi uma potopotoga faapea sa tau faatulaga e isi foi sui sauva e pei foi o le peresitene o loo tulai mai nei, ina ia toe tolopo uma nei fuafuaga, e lē gata mo le saogalemu ona o lea o loo vevesi uma lagona o tagata i lenei taimi, aemaise foi e lē o se vaaiga lelei le unai atu o ni polokalame faapea mea ane o loo taulai manatu o tagata i le faalavelave na semanu e ma’umau ai le soifua o se tasi o ta’ita’i o le atunuu.
Na vave foi ona tuu e Trump lana faafetai i luga o le social media e faafetaia ai le galuega mae’ae’a ma gaioiga vave a leoleo mo le puipuia o lona soifua, ma sa faaalia foi e se sui sooupu a le aiga o Trump, o loo saogalemu ma iai i se tulaga lelei si o latou tamā.
O Trump ua 78 tausaga o lona soifua ma sa avea o ia ma Peresitene lona 45 o Amerika mai ia Ianuari 20, 2017 – Januari 20, 2021.
Puna o Faamatalaga: https://www.bbc.com/news/live/cljy6yz1j6gt
