Ua mautu nei fausaga o le atina’e o le pulea tatau ma le vaaia lelei o tamaoaiga o le gataifale o le afioaga o Mutiatele i Aleipata, e pei ona pasia lana tusi taiala mo lea fuafuaga ma ua tuuina atu loa iai ma le laupapa faailoilo, o maka o le faasao o lo latou gataifale faapea mea fagota ua saunia e le polokalame o loo faafoe e le matagaluega o faatoaga ma faigafaiva e ta’ua o le SAFROM.
O le motu o Namu’a ua faatutū ai laupapa faailoilo e faailoa ai nofoaga o le faasao o le gataifale o le afioaga, ma e tāua ia faailoilo e silafia ai e le lautele o le atunuu ma tagata tafafao e afea lea motu.
Ua faailoa i se pepa o faamatalaga o le naunautaiga o alii ma faipule ma tagata o Mutiatele ia faatino lea galuega auā se lumanai manuia o tupulaga o le nuu e lē gata mo le taimi nei, a o tausaga oi luma.
O se galuega foi ua faatino e avea ma sao o Muatiatele i le pitolaau a le Malo e tali atu ai i suiga tetele o le tau.
