O le aoauli o le Aso Sa, 17 Tesema 2023, na to’ai taunuu ai i le malaevaalele faavaomalo i Faleolo tino maliliu o alo o le atunuu lea na aafia mai se faalavelave tau taavale i Vitoria i Melepone Ausetalia i le masina talu ai.

O le faigalotu puupuu na saunia e sui o Ekalesia Soofaatasi i le faletapuai a le malaevaalele, ina ia faaoo atu ai faamaisega ma faamafanafanaga i aiga faanoanoa o taulelea e toafā ua satia soifua i le maliu ma le oti ona o le faalavelave faafuasei na tulai mai.

O le susuga i le failautusi aoao o le Fono o Ekalesia Soofaatasi i Samoa, Susuga ia Rev Ma’auga Motu na taitaia le sauniga, ona sosoo lea ma se saunoaga na avea ai le Minisita o Tupe, Afioga Lautimu’ia Afoa Uelese Vaai, ma sui o le Malo e momoli le faafetai i le mamalu o aiga, ona o le galulue faatasi ma le matagaluega sa nafa ma fesootaiga ma felatalanoaa’iga ma sui o le malo o loo galulue mai Ausetalia mo le faafaigofieina aemaise ina ia vave ona faaoo mai o latou tino maliliu i Samoa mo le tapuai atu o aiga faanoanoa.

O i latou ua maliliu o Alesana Anitelea e 34 tausaga o le soifua mai le afioaga o Safotu Savaii, o ia o se tamā ua fai lona aiga ma e toatasi si ona alo; o Aperaamo Tapelu e 24 tausaga o le soifua mai le afioaga o Letogo; o David Atonio Gasologa e 27 tausaga o le soifua mai le afioaga o Falefa, ma Darrick Amouta Peleti e 28 tausaga o le soifua mai afioaga o Lufilufi ma Falevao.

O lenei faalavelave na tulai mai ina ua lavea le taavale na faimalaga ai nei alii ina ua toe taliu mai se latou evaga na asiasi atu ai le fale o sa latou uo, ma feto’ai ai le latou taavale o le Kia Carnival ma se laau ma sasao a’e ai le afi ua mu ai le taavale e latalata i Mansfield, 220km i matu i sasa’e i Melepone.

O le susuga Aufa’i Fulisiailagitele Saleuesile, o ia o loo avea ma Sui Sooupu o Galuega Faavaitaimi a Samoa i Ausetalia, o ia foi sa tulai e avea ma fofoga i le faagasologa o le polokalame o le sauniga.

Na saunoa Aufa’i, ona o le tulaga ogaoga na iai tino maliliu o nei alo o le atunuu, sa ia toe tatalo mai ai i aiga ina ia utagia taiala ua faatulaga mai Ausetalia aemaise le matagaluega na tapena maia tino maliliu o tama, ma ua mae’a foi ona taufai malilie iai sui o aiga, ina ia manatua o latou alo i foliga na latou faamavae iai i le taimi mulimuli na tuua ai Samoa ina ua malaga atu i Ausetalia, ae o le a lē mafai ona toe tatalaina o latou pusamaliu.

Na mae’a le sauniga ma upu faaiu a lē na avea ma fofoga o le aso, ona tali fuaitau atu lea o le Afioga Fanualelei e fai ma sui o aiga e molimoli mai se faafetai i le afioga i le Alii Minisita ma sui o le Malo, ona ta’ape ai lea o le sauniga, ma molimoli atu tino maliliu o alii taitasi i o latou afioaga ma aiga, mo le faaauauina o toe vaega o o latou sauniga i aso ua faatulaga e aiga e faamavae atu ai ia i latou.