Sa lei fiafia le faiaoga a le kalapu liki a le Penrith Panthers i Ausetalia i fesili e tusa ma le lumanai o le latou tama talavou mataina le taalo ma le sui o le Toa Samoa o Taylan May.

O May, e 22 tausaga ua tele iai talanoaga e tusa ma lana tusitusiga i luga o le itulau o fetusiaiga a le Instagram i le faaiuga o le vaiaso, a o mataituina e kalapu le tulaga o lana feagaiga.

O le vaiaso nei sa faailoa ai e le alii tusitala o le polokalame a le 100% Footy ma le lomiga a le Sydney Morning Herald i Ausetalia, Michael Chammas e faapea, o le mae’a o le feagaiga a May ma le Panthers ua tosina iai kalapu a le Storm, Dragons ma Roosters.

Ae o le isi lipoti a le Herald i le aso ananafi sa faailoa ai, le mananao o le St George Illawarra Dragons, e toso atu May ma le isi ona uso ia Terrell, e pei ona telē sona lelei i le laina i luma.

O le Penrith Panthers, e iai le talitonuga sa latou folasia se isi toe faaopoopoga o le latou feagaiga ma Taylan e $500,000.00 i le tausaga, ae o le Roosters ua sauni e totogi ia lona uso ia Terrell i lea lava vaega tupe pe afai e nofo ai pea i Bondi.

Ae sa faailo e Taylan, o lona tausaga mulimuli lenei i le auvae o le mauga i Penrith, ina ua ia lafoa sona ata i luga o fesootaiga lautele ma se faaupuga, o se tietiega mulimuli – last ride.

O le faaupuga lava foi lea sa faia e le isi sui o le Toa Samoa o Jarome Luai e faama’oti ai lona tausaga mulimuli lenei mo le Panthers.

I le feiloaiga ma le autusitala i le aso ananafi sa lei iai se fiafia o le faiaoga o Ivan Cleary e talanoaina le lumanai o Taylan.

Ae ua agiga, o lea auuso e faaono mafai ona avea ma se feagaiga ta-aofai e aofia uma ai i laua e toalua, e pei ona mananao ai e taaalo faatasi i le ‘au e tasi i le NRL.

O le Dragons sa lipotia, le naunau ina ia auina atu lea auuso i Wollongong.

Faaalia e le faiaoga o Shane Flanagan i le Sydney Morning Herald, afai e avanoa lea auuso i le maketi, o le mea moni o le a latou tilotilo iai.