A’o tele ai fesili i ni tagi o palota laiti e ono tulai mai ua mautu le nofoa o Sagaga No.4 lea na manumalo ai le afioga ia Tagaloatele Pasi Poloa ina ua faamaonia mai e le sui na malolo e le’o iai se manatu ia te ia e ave ai saga tagi i le faamasinoga.
O le afioga ia Tuisā Tulimasealii Tasi Patea o le sui a le vaega faaupufai a le HRPP lea na tauva ma le afioga ia Tagaloatele ma e le’i manuia ana taumafaiga peitai e leai se faamoemoe ia Tuisā e faaulu ai se tagi I le iuga o palota laiti mo Sagaga No.4.
Na ia taua “E leai se lagona ia te au ou te alu i le Faamasinoga, ona ou te le manao e faatasina lo’u itumalo”.
Na ia ave foi faamanuaiga ma faamalosiau i le sui fou mo le latou itumalo “Ia manuia lou tulai mai, maua le tofa e tauave ai faiva aua se manuia o le ta Itumalo”.
E pei ona silafia o le iuga o faigapalota laiti i le Aso 26 o Novema na tulai mai ai Tagaloatele Pasi Poloa i le tulaga muamua i palota e 1217 ae mo Tuisā Tulimasealii Tasi Patea na maua palota e 801.
