Ua atoa le vaiaso talu ona salalau i se lipoti a le nusipepa i Peletania o le Telegraph ma toe faasalalau e le nusipepa o le NZ Herald, lea lava lipoti i ni faaletonu o aafia ai tapenaga o potu o le faletalimalo o le a faamautu ai le Tupu o Peletania ma lana Masiofo, pe a malaga mai ia Oketopa mo le Fono a Malo o le Taupulega.
O le salalau o lea lipoti i upega tafailagi aemaise le api o foliga e toatele tagata i fafo ma lo tatou atunuu ua faaalia ai o latou manatu lē fiafia ma faitioina nusipepa na faasalalauina lea lipoti, ona e lē moni.
Sa saili se finagalo o le faletalimalo o le Sinalei pe faamaonia ia lipoti pe leai ae e lei maua se faamatalaga.
E oo foi i se faamatalaga mai le asosi o faletalimalo, aemaise o le malo o loo feagai ma tapenaga, e leai lava.
O le tele o lagona faitio i le lipoti ona o loo maualuga le talitonuga o loo sologa lelei tapenaga a Samoa i lana taligamalo, e pei ona sa asia e ni sui o Malo o le Taupulega ia tapenaga i se vaiaso e lei mamao atu.
O le faai’uga o le masina nei o le a toe asia ai foi nofoaga e faia ai le fono faapea faletalimalo o le a faamautu ai usugafono mai fafo.
