Ua leai mai le tamaitai palemia, Jacinda Ardern I le valaau e taofia loa le toe omai o tagata Niu Sila o loo I atunuu I fafo
Ua faitau masina o faamaonia le tele o I latou mai fafo e omai ma le Koviti, ma o le sao mai ai foi ma isi vairusi fou ua avea ma tulaga ua faapopoleina ai le toatele
E pei ona auina atu I tala I vaiaso e le I mamao atu le faatalosaga e le toatele o tagata suesue faapitoa atoa ai ma le taitai o le National, Judith Collins, ua tatau ia Niu Sila ona tapunia ona faitotoa mo se taimi le tumau I atunuu o loo sasao ai le vairusi fou lea e faapea e vave tele lona pepesi
Ae I se livestream poo faatalanoaga tuusao I luga o le Facebook I le po o le Aso Lua o le vaiaso nei, ua faailoa manino ai e Jacinda, e na te le taliaina le talosaga, ona o loo iai le aia tatau a tagata sitiseni e toe foi mai ai
O le tapunia foi o tuaoi o Niu Sila, o lona uiga o le a aafia ai foi ma oloa auina mai atunuu I fafo aemaise vailaau ma meafaigaluega o loo moomia e le vaega a le soifua maloloina, ma e na te le o iloa foi poo iai se isi atunuu o loo faasaina le toe foi atu o ona ia lava tagata
Ao teena ai la e Jacinda le taofia o nei faigamalaga, ua ia faamaonia e faaauau pea polokalame o loo faanofoesea ai tagata mai fafo atoa ma tapu o loo taiala ai nei auaunaga Ae mo nisi suiga mo le agai I luma, o le a fua lea I tui puipui o le Koviti atoa ai ma suesuega o loo faia pea, pe faamata e mafai e nei tui puipui ona taofia le pepesi o le Koviti
