O le masina o Oketopa ua faamoemoe e lē toe faanofoesea tagata faigaluega faavaitaimi mai Samoa e malaga mai i Niu Sila ina ua maea ona sainia e le Palemia o Samoa Fiame Naomi Mataafa faapea le Palemia o Niu Sila Jacinda Ardern se maliega e aloaia ai lea suiga fou i aiaiga o puipuiga o atunuu e lua mai le Koviti 19.
O le aumalaga o tagata faigaluega faavaitaimi mai Samoa o le a tuua le atunuu i le Aso Lua o le vaiaso fou o le a amata ai lea suiga. O lona uiga a taunuu i Niu Sila e lē toe faanofo vaavaaia pe quarantine mo le 14 aso ae o le a agai sa’o loa i nofoaga o le a galulue ai.
O loo aiaia e tatau ona fai tui puipui mo tagata faigaluega uma ao lei malaga ese ma Samoa ma e iai foi suesuega o faamaumauga faafomai e faailoa ai ae leo aafia se tasi o i latou i le vairusi ao lei ulufale i le vaalele.
E le’o aofia i le maliega ua sainia tagata Malaga e toe foi atu i Samoa mai Niu Sila ona e tatau lava ona usitaia puipuiga faalesoifua maloloina ma faanofoesea pe a taunuu i le atunuu.
Ua faaalia foi i se pepa o faamatalaga mai le Ofisa sooupu a le Mālō o lea maliega ua sainia e taitai o atunuu e lua o leisi lea faailoga o le tausia pea o sootaga vāvā lalata o Samoa ma Niu Sila i tulaga faavaomalo.
