Ua faaali manino e le Minisita o le Va i Fafo ma Fefaataua’iga, Winston Peters lona lē toe tali mai i ni fesili tau i mataupu faalotoifale a Niu Sila a o iai i ona tiute faavaomalo.
O le tali lea a le Sui Palemia, ina ua tulituliloa atu e le autusitala lana saunoaga sa ia faia aga’i i le Palemia o Christopher Luxon i se folasaga sa faia e Luxon faatatau lea i mataupu tau fefaataua’iga.
I lipoti mai le Leitio faavaomalo a Niu Sila, o loo lipotia ai le upuia ma le faitioina e le Minisita o le Va i Fafo o faaupuga ua faaaogā e Luxon e faamatala ai tulaga o loo iai nei faatinoga o fefaataua’iga, e manatu Peters, ua faaaogāina e Luxon faaupuga faamiliteli e pei o le trade war.
Ua lipotia foi le faitioina e Winston Peters o Christopher Luxon ona o lona lē amana’iaina o ia i lona lē valaau atu e latou te faasoa ma fetuuna’i a o le’i talanoa atu i ta’ita’i o atunuu i fafo mo talanoaga i fefaataua’iga.
Ma ua manatu ai Peters, o nisi o faaupuga sa faaaogāina mo lea fosalaga ua fai lava sina lē talafeagai ma e le’i mafaufauina lelei.
Ae e ui i nei faamatalaga a Peters, o loo faailo e le alii Palemia o loo sologa lelei lava feutaga’iga ma lana Sui Palemia, ma ia faamaonia o loo lelei lava lo la va ma Winston Peters faapea nisi o ana minisita.
O loo i Hawaii le alii o Winston Peters i le mae’a ai o lana asiasiga i le malo o Tonga, ma o le a mulimuli ona ia asia le atunuu o Vanuatu.
O se malaga a Winston Peters i le Pasefika, ina ia faamausalī pea le sootaga a Niu Sila ma ana paaga.
Puna o Faamatalaga: https://www.rnz.co.nz/news/national/558183/winston-peters-won-t-speak-while-overseas-on-pm-s-hysterical-trade-language
