Ua lapataia le au aveloli i Sini ina ia toe siaki a latou uta poo saogalemu ona o se taumafaiga e unaia le faaitiitia o faalavelave e tutupu i le aai o Sini aemaise lava i lalo o ana poo tunnels.
O le asō ua folafola ai e le faigamalo i Niu Sa Uelese ua o latou faafesootaia ai kamupani scrap metal poo kamupani latou te la’uina uamea ma i latou e feaveaia masini mamafa e faamanatu iai le tāua o le faamautinoa o loo saogalemu le feaveaiina o a latou uta ma ia kava lelei uta e faaaogā ai se tapoleni.
Ua faia lea tulaga i le mae’a o nisi o mataupu na poloka ai le Harbor Tunnel i Sini atoa ai ma le Eastern Distributor i le vaiaso nei e mafua mai i loli ma o le faamanatu la a le faigamalo i aveloli e mafai ona laveaiina soifua pe a lelei ona faatino foi le latou matafaioi.
Fai mai talu mai le aso 14 o Iuni o le tausaga nei e faa 33 taimi na tapunia ai tunnels i Sini ona e mafua mai i tulaga faapea, a lē lusi ma toulu uta i le auala, poo le afaina foi o sensors i tunnels ina ua pā’ia e loli ona o le maualuga ua iai a latou uta.
E ono la masina e faamalolo lē tumau ai se laisene aveloli pe afai e lē usitaia faamatalaga ua faamatuu ane ma e ono oo atu i le silia ma le fā afe se tupe e totogi mo faasalaga atoa ai ma le 12 demerit points.
