O le Ekalesia Faapotopotoga Kerisiano Samoa i Sapapalii o se tasi lea o aulotu ua latou lagolagoina aoaoga o loo faagasolo a le Toomaga mo ē Puapuagatia faatasi ai ma le faalapotopotoga a Malo Aufaatasi e faapitoa i polokalame mo le puipuia o fanauiti le UNICEF Pacific, i le tuuina atu o aoaoga e faalauiloa ai auala e puipuia ai fanau mai le tele o lavelave o faafitauli.
O le tasi o faafitauli o loo faatāua i ia aoaoga sa faatino i le aulotu EFKS i Sapapalii o le pitolaau a mātua e faatino i le vaaia lelei o alo ma fanau a o laiti i latou, auā o se isi lea o vala e masani ona aliali mai o le sauaina o fanau i le tino ma le mafaufau.
O le tasi o faamoemoe o lea polokalame e pei ona faailoa i se pepa o faamatalaga o le taofia o auala o loo aoai ai fanau e nisi mātua, ma iu ina aafia ai i le tulafono.
