Ua faailoa le lē fiafia o Kanata i le faaooina o le oti e Saina i sitiseni e to’afā o Kanata na aofia i mataupu tau fuālaau faasāina na aveina atu i Saina i le amataga o le tausaga nei atoa ai foi ma le tetee malosi o Kanata i le faasalaga oti a Saina i mataupu faapea.
O le minisita o le va i fafo a Kanata, Melanie Joly sa ia faailoa i le autusitala o le to’afā o tagata ua maliliu e ta’i lua a latou sitiseni ma ua talosaga ai mo se faamāmā avega i isi foi sitiseni o Kanata o loo taofia foi i mataupu lava faapea i Saina.
Talu mai lava le 2018 e lē o iloga lava ona sologa lelei sootaga i le va o Saina ma Kanata ina ua taofia le Ofisa Sili o tupe a Saina o Meng Wangzhou i Vancouver ona o le talosaga mai le faigamalo a Trump i lea taimi, na pu’e ai loa e Saina isi tagata Kanata e to’alua mulimuli ane ma faato’ā faasa’oloto i latou uma ia faatasi ai ma Meng i le 2021.
O le amataga foi o le masina nei na folafola ai e Beijing le tuuina o ana lafoga faaopoopo i oloa a Kanata o loo aveina atu i lo latou atunuu auā sa tuuina foi isi totogi faaopoopo e Ottawa, se tasi pitonuu o Kanata i luga o taavale a Saina ma le u’amea ma le alumini i le tausaga talu ai.
Puna o Faamatalaga: https://edition.cnn.com/2025/03/19/americas/canada-condemns-china-drug-execution-intl-hnk/index.html
