E 52 tausaga o se tamā ua tuli nei le iva tausaga o lona faasalaga i le falepuipui, ina ua faamaonia e se laulau o faatonu ona moliaga o lona faamalosi o se teineititi 17 tausaga, o se tama teine a se tina sa nonofo ma lē ua faasalaina, ae ese lona tamā.
O tausaga uma e iva ua tuli faatasi ai ma faasalaga o isi ona moliaga e lua e fesootai lava i le faia o lea solitulafono.
O Sepulenato Lemalu e tusa o faamaumauga a leoleo, sa tuuina atu i le faamasinoga o se tagata sa faigaluega i le kamupani o le Sarkist i Tutuila i ni tausaga ona toe foi mai lea i Samoa ma galue i le faatoaga e tausi ai lona aiga.
E molia e leoleo o loo ia umia se tofiga i lana ekalesia o le fesoasoani i le tuuina atu o le areto i taimi o le faamanatuga. I le silasila a le faamasinoga i le matuia o lana solitulafono na amata ai le faasalaga i le 10 tausaga peitai ona o nisi o itu lelei faasino i le moliaga na toesea ai ni masina ae totoe ai le iva tausaga ua mofosala ai nei.
Sa faatāua foi i le faaiuga o le faasalaga le faateaina ma lona nuu ma tuu iai se sala mamafa e lima sefulu aumatua. E lau le faasalaga o Sepulenato ua toe faaa’e ma le nuu.
