E $50 miliona le isi tupe faaopoopo ua ofo atu e le Malo o Ausetalia aga’i i se faaputugatupe faavaomalo e feagai ma aafiaga o mea faaleagaina e mafua mai i suiga o le tau.
O le folasaga a le malo o Ausetalia sa faia i le fonotaga a Malo Aufaatasi e faatatau i le tau poo le climate o loo faagasolo i Azerbaijan lea o loo taumafai ai sui auai e faatulaga se isi taula’iga fou mo lea faaputugatupe.
Fai mai le ABC o Ausetalia le atunuu lona ono aupito i tele le foa’i i lea faaputugatupe ma o le saunoaga a le minisita o suiga i le tau a Ausetalia, Chris Bowen i le fonotaga a le COP29 na ia ta’ua ai o le fesoasoani faaopoopo lea a Ausetalia i luga atu o le isi 100 miliona sa foa’iina i le Pacific Resilience Facility, o se nofoaga e umia e le Pasefika e fesoasoani e tali atu i aafiaga o suiga o le tau i le Blue Pacific Continent.
O Dave Sweeney mai le Australian Conservation Foundation ua ia ta’ua e manaia ua taulamua Ausetalia i le ofoina o lea fesoasoani tau tupe, peitai i totonu lava ia o lona lotoifale e lē o faaitiitia le susunuina o oloa ma mea e afua ai le faaleagaina o le osone o lona uiga la a tuu i le silasila faavaomalo i lea mataupu e lē taitai lava ia tupe e faafetauia ai aafiaga o gaioiga o loo faia i le atunuu e afua ai suiga lē lelei o le tau.
Puna o Faamatalaga: https://www.abc.net.au/news/2024-11-20/australia-50-million-commitment-deal-with-climate-change/104622454
