Ua faailoa lautele ai nei se suiga i le tofi Konesula poo le Honorary Consul o le malo o Siamani e faamautū i Samoa, ina ua mae’a se faatasiga na faalauiloa ai le see atu o le afioga Afoa Stefan Szegedi na te tauave lea tofiga o lona malo, ina ua mae’a le taimi sa avea ai lona tuaa tinā le afioga Tagaloa Christa Szegedi ma Konesula mo le umi e lima tausaga.
Mo le silafia o lea aiga mai Siamani e faamautū i Samoa ma o loo faafoeina le pisinisi o le Treasure Box lea o loo faatau ai asoa, o filifili ma mama mo teuga, aemaise lava o se pisinisi o loo latou faatau mai i tagata o le tatou atunuu mama, o filifili ma asoa e gaosia i le auro.
I le sauniga na faalauiloa ai le konesula fou o lea atunuu mo Samoa na faaalia ai e le amepasa o Siamani mo Samoa e faamautū i Niu Sila, o le a faaauau e Afoa Stefan le galuega lelei sa faia e lona tinā a o tauaveina le tofi, o le aumai faatasi o tagata Samoa ma Siamani ina maua le galulue faatasi.
O Siamani o se Malo sa latou pulea lo tatou atunuu i tausaga e tele ua tuana’i, ma o loo manatua pea lona sao i faato’aga tetele sa latou faia mo le atina’e o Samoa i ona po o ana pulega faakolone.
