O se taeao fou mo Samoa ina ua tuu mai le faaiuga a le faamasinoga toe iloilo poo le faamasinoga apili ua amanaia ai le faatautoga a le vaega faaupufai a le Faatuatua i le Atua Samoa ua Tasi lea na fai i lalo o le faleie i le Aso 24 o Me 2021.
O le Aso Faraile 23 o Iulai lea na tuu mai ai le faaiuga a le faamasinoga lea na taitaia e le afioga i le Faamasino Sili Satiu Simativa Perese, ma tamaitai faamasino e toalua ia Niava Mata Tuatagaloa ma Tafaoimalo Leilani Tuala Warren.
O le fesili tele la lea ua tulai mai poo fea o le a agai iai sui filifilia a le HRPP lea na manumalo mai i le faigapalota i le Aso 9 o Aperila aua o lea e le’i faatautoina.
Na fesiligia e le vasega o tusitala le tamaitai Palemia Fiame Naomi Mataafa i sona finagalo i lea mataupu tali Fiame o le ā mafaufau iai aua o le iuga a le faamasinoga o sui e 26 a le FAST ua atoa ai sui e mafai ona pasia ai le tala o le tupe ma faagaioi ai le malo fou ma e tatau ona toe foi i le faavae e tagatagai ai pe iai se auala faaletulafono e faatino ai se gaioiga mo e na filifilia ae e le’i faatautoina i totonu o le 45 aso talu ona maea le faiga palota.
O le ripoti mai le sui o le Radio Samoa ia Galumalemana Tipi Autagavaia na ia taua i lona lava manatu ua soloia nofoa ma e foliga mai o sui filiiflia uma e 17 a le HRPP e ono toe foi e fai faigapalota laiti. O le taimi nei e le’o mautinoa poo le a le tulaga o le a iai le lumanai mo sui filifilia a le HRPP.
I se faatalatalanoaga i luga o le Breakfast Show a le TVNZ i le taeao nei na taua e le Palemia ia Fiame “o taimi faapenei i nisi o malo e fefaamālōa’i le isi i le isi ae e le’i vili mai Tuilaepa e faamanuia mai i le malo fou pau le talosaga na tuuina mai pe e mafai ni aso se 7 se’i tapena ese ai sui o le HRPP mai ofisa o le malo, o la’u tali na ave iai ia ta ifo le 5 i le afiafi nei (taimi samoa) ua tatau ona faaavanoa ofisa o le Malo aua o le faaiuga lea a le faamasinoga mai le vaiaso na tea nei”. Na talosaga foi Fiame i le HRPP mo se feiloaiga i le aoauli nei ma e le’i maua mai se tali mai lea vaega faaupufai.
Na ripotia i le taeao nei se finagalo o Tuilaepa Lupesoliai Sailele Malielegaoi e faapea e mafai ona galulue soosoo tauau ma le malo fou ma o le itula e 3 i le afiafi nei (taimi Samoa) o le a tuuina mai loa se faamatalaga faamavae a le taitai o le HRPP.
O le aso a taeao Aso Lua 27 o Iulai o loo fuafua e faia ai le uluai fonotaga a le Kapeneta i le maota fono o Samoa.
