O le meli suamalie poo le honey o loo maua i Samoa o se tasi o oloa tau faatoaga e manaomia tele mo le gaosia o isi oloa ona o lona lelei i le tausia o le soifua maloloina. O le meli suamalie e faalagolago lona maua pea ma lona lelei i le taumafa i le galuega a lagomeli, ae o se tasi lea o lu’itau ua feagai ma lea atina’e tau faatoaga i Samoa ma le lalolagi.
O isi o ia lu’itau ma faafitauli o faama’i ma ituaiga o vairusi ua mamate ai ia meaola ma faaitiitia ai lagomeli latou te mimiti mai le suamalie o fugalaau eseese ma faaputu e maua ai le meli suamalie poo le honey.
O se suesuega na faia i lenei atina’e i le atunuu i le 20 tausaga ua mavae na faamauina ai o nisi o faama’i o aafia ai lenei atina’e tau faatoaga i Niu Sila e lē o aafia ai Samoa ma o se tulaga lelei lea i le unaia o le gaosia o le meli suamalie e le gata o tupe lelei i le faatau atu i le lautele o le atunuu ae faapea foi i le auina atu i fafo.
Ua faaalia e le afioga i le Minisita o Faatoaga ma Faigafaiva, susuga Laauli Leuatea Polataivao Fosi Schmidt, ua tuuitiitia lagomeli mo le lelei o le atina’e, ae o se taumafaiga e luu tupe ai le au faifaatoaga o gaosia le meli suamalie. O le finagalo o le Minisita na faalauaitele mai i le Aso Tofi na faamanatu ai le aso faavaomalo o faatoaga lagomeli.
O le lima lenei o tausaga o faamanatu e Samoa lea aso tāua ma galulue ai le faalapotopotoga o tamaitai fai faatoaga a le atunuu o loo atina’eina lea taumafa e faia a’oa’oga e faailoa ai le tāua o le puipuia lelei o lagomeli auā o le au tautua malosi i le gaosiga o le meli suamalie poo le honey
