E ono faaumiumi ona tigaina Niu Sila mai le galu lona lima o le koviti ma lona vairusi fou JN.1.

O se lapataiga mai le alii suesue faapitoa ia Michael Baker a o faatupulaia ai pea tagata aafia i le koviti faapea ai ma i latou e taofia i falemai.

I faamaumauga a le soifua maloloina o le silia lava ma le tasi afe lea o loo iai cases faamaonia i totonu o le aso e tasi, tusa lea ua 3.5% ua faga ai i luga pe a faatusa i le vaiaso ua tuanai.

E oo mai ananafi ua faamauina le taofia o le 343 o tagata ua maua i le koviti i totonu o le na o le masina o Tesema, ma e lē faate’ia ai Baker i ia fuainumera.

O le JN.1 o se tasi o vairusi o le Omicron ma o loo taatele i atunuu e iai Amerika.

Pe ā ma le toe lua masina lea ua vavalo e Baker o le a faaauau ai pea ona taamilomilo le JN.1.

O le fautuaga mai le matagaluega a le soifua maloloina i tagata Kiwi a o alo atu i le faamanatuina o le Tausaga Fou, afai e lē o malosi atoatoa fai le siaki ma nofo i le fale.