Ua osofaia i le tele o faitioga le auaunaga a le falemaliu o le Tipene Funerals ona o le faatinoga o galuega a se tasi o ona faatonu, o Fiona Bakulich sa galue ai i le falemaliu.

E tusa ai ma se lipoti o lenei mataupu o loo faailoa i le NZ Herald, o loo ta’ua ai, o le fanuatanu o le Malo i Waikumete o loo iai se fale poo se LOA, o se nofoaga faapitoa e teu ai i totonu pusamaliu o nisi iloga poo tagata taualoa, lea o loo teu ai ma tinomaliliu o nisi tamalii iloga o Samoa i Aukilani nai lo le tanumia i tuugamau masani i le palapala.

O lenei nofoaga e tāpā e le falemaliu le totogi atu e le aiga o le tau e $3,000 mo le teuina o le tinomaliu o le latou tagata i totonu o se pusaoti (coffin) e kava totonu i le apa ituaiga o le zinc, stainless steel, tin poo le copper, ona toe teu ai lea i totonu o se pusaoti lautele (casket) laupapa a o lei sulu atu i totonu o lona potu (vault) lea o loo iai i le LOA poo le nofoaga faapitoa lenei.

O le faatuatuaga lena sa tuu atu atoa e tagata ma aiga faavauvau i le auaunaga a le Bakulich and Tipene Funerals ma latou totogia lea tau telē ina ia faamautinoa le teuina aloaia ma pelega uma sa faia mo toe taimi o lē pele ua maliu.

Peitai o le afatia ai o le atunuu i le Afā o Gabrielle i le masina o Mati o le tausaga talu ai, na faaleagaina ai lena LOA i le fanuatanu i Waikumete, ma manaomia ai ona faia ni galuega toe faaleleia, ma sa manaomia ai le maliega a aiga e ona tinomaliliu o o latou tagata o loo iai i lea LOA tele, ina ia faatino ai lenei galuega toe faaleleia.

Sa faataga ai aiga e mafai ona auai atu i le taimi o le a talai ai potu taitasi o loo teu ai pusaoti ma aveese mai i fofo.

I se lipoti o loo faasalalauina i le NZ Herald lea na faatalanoa ai se tasi o tauaiga o i latou o loo iai o latou tinomaliliu i lea nofoaga, na ta’ua e lea tauaiga, ‘ina ua aumai i fafo pusaoti (caskets) ma tatala e tagata o aiga, pagā le tiga o se vaaiga faamomoiloto ma le faanoanoa na latou vaaia, ma ua na o le lauē ma fe’ei a o vaai atu i le faiga o nai o latou tagata maliliu.’

Nai lo le teu lelei o tino maliliu i totonu o pusaoti (coffins) e kava i ‘apa anagatā lea sa totogi le ta’i $3,000 e aiga, ae na maua ai e na ona fafao lava o tino maliliu i totonu o tagapepa lapisi ma tuu i totonu o pusaoti laupapa.

Na ta’ua foi e nei tauaiga, o le faiga lava ia sa tatau ona iai e mafai e le aiga ona faia a latou faamavaega faaleaganuu ma ni pesepesega faaiu e faamavae ai i le tinomaliu o lo latou tagata i lo latou fale, a o lei tuuina i totonu o pusamaliu (coffins) ma tapuni mau loa ma ave i le nofoaga o le a teu ai i le aso e sosoo ai.

Peitai sa lei faatagaina e Bakulich lena avanoa mo latou e fai ai a latou faamavaega mulimuli, ae ua tuu ai lava o latou tagata maliliu i le falemaliu, o iinā la lea sa mafai ona faatino ai lea gaioiga faatufanua ma le lē alofa ae aunoa ma se iloaina e le aiga.

Ina ua fesiligia e le sui o le Herald le susuga Francis Tipene na ia ta’ua ai, e leai sona iloa o loo faia e Fiona se gaioiga faapea i tinomaliliu o tagata, ma o le mea moni o le taimi e latou te faataatia ai le tino i totonu ma faamau loa le pusaoti (coffin) lea e pito i totonu, o iinā foi e faato’ā uma ai faamavaega mulimuli a le aiga ma lo latou tagata maliu.

Peitai e leai se mea faapena na tupu; afai o le a teu le tinomaliu i le LOA, e faamavae lava le aiga i lo latou tagata maliu i le falesa ma aveese atu ai loa mo le nofoaga e teu ai, o se faiga na matuā lagona ai le faanoanoa ma lagona tiga o aiga o le tagata ua maliu.

Na ta’ua e le susuga Tipene i le sui o le Herald, ua matuā lagona e le latou auaunaga le faanoanoa ma le matamuli ona o lenei mea ua tulai mai, ma se gaioiga maulalo na faatino e se tasi o lana aufaigaluega, ma momoli ai foi lana faamaulaloga ma se faatoesega aemaise lava i aiga ua afaina i lenei gaioiga.

Na ta’ua e Tipene, o le taimi lava na ia iloa ai le mea ua tupu, sa vave ona ia fesootai atu i aiga ua afaina ma faaoo iai le faatoesega ma folafola atu i ai o le a latou faia mea uma e mafai ina ia toe faasa’o le sese ua fai.

O le tamaitai o Fiona Bakulich o se tagata ua leva ona galue mo le Tipene Funerals mo le fitu tausaga, o le mafuaaga foi lea ua tuu atoa i ai le faatuatuaga e lē gata o le pulega a le falemaliu ae faapea foi i aiga o i latou ua maliliu, o loo ia faatinoina se auaunaga atoatoa ma le faamalieina.

Ua lipotia le tusi atu o le pulega a le falemaliu i aiga uma ua afaina ma faailoa atu ni seleni o le a totogi e taui ai le faaletonu na iai, e lē gata i lea ua ofo atu foi e mafai ona liutofaga mai nisi tino o latou aiga ua maliliu ma o loo tanu i tuugamau ae aumai e teu uma i totonu o le LOA e aunoa ma se isi tupe e toe totogi.

Na folafola ma faamautinoa e Tipene, o le a lē toe tulai mai se isi faaletonu faapea i le lumanai, ae mo le sui o le aufaigaluega na faatinoina le gaioiga lē taualoa, ua lē o toe faigaluega nei i le falemaliu.