Ua faia se malologa a le vasega o faatonu i le faamasinoga o le alii o Jarryd Hayne lea sa taalo i le NRL, i le mataupu o loo tuuaia ai i le faia o uiga matagā fai faamalosi i se tamaitai. 

Fai mai le loia a Hayne e le o lava molimau a lea tamaitai e faamaonia ai le solitulafono o le alii taalo. Ua lua vaiaso o faagasolo le mataupu i le faamasinoga faaitumalo i Niu Sa Uelese.

E 35 tausaga o Hayne ma o loo ia teena ia tuuaiga ae le o mafai ona faailoaina le suafa o le tamaitai o loo aofia ona o mafuaaga faaletulafono.

O le alii o Hayne e pei ona silafia o se tasi lea o fetu pupula a le Paramatta Eels sa iai ma sa taalo foi i le State of Origin mo Niu Sa Uelese ma taalo faavaomalo foi mo Ausetalia ma lona atunuu o FIti. 

O le vasega o faatonu i lea faamasinoga e toaono tamaitai ma le toaono o alii o loo iloilo nei sa latou faaiuga i le mataupu.