I le faagasologa o le taamilosaga o le lakapi liki i le vaiaso nei e lē taumate o le a iai suiga i le taaloga i le po nanei a le Panthers ma le Broncos ona ua lipotia o le a lē avanoa Payne Haas mo le Broncos ona o se manu’aga i lona vae.
O loo iai foi isi lipoti ua alia’e i le aoauli nei ua ta’ua ai e iu ina faasee i le faaleoleo le alii o Damien Cook mai le South Sydney Rabbitohs i le faaiuga o le vaiaso ae suitulaga iai Siliva Havili.
O taaloga o le vaiaso nei, o le a fetaui le Penrith Panthers ma le Brisbane Broncos i le BlueBet Stadium i le ta o le 8, aso a taeao e fetaui ai le NZ Warriors ma le Canberra Raiders i Kalaiesetete.
O le Sydney Roosters e fetaui ma le South Sydney Rabbitohs i le Allianz Stadium.
O taaloga o le Aso Toonai, o le Bulldogs e taaalo ma le Gold Coast Titans ae fetaui le St George Illawara Dragons ma le Cowboys mai Kuiniselani i le Jubilee Stadium.
O le West Tigers e taaalo ma le Sharks atoa ai ma le taaloga a le Paramatta Eels ma Manly Sea Eagles i le CommBank Stadium.
O le ‘au a le Newcastle Knights e fetaui ma le afā malosi mai Melepone poo le Storm i le McDonald Jones Stadium.
