Ua tuanai le 2 masina talu ona toe tatala o tatou tuaoi faavaomalo, ma ua aveesea foi ma aiaiga o puipuiga faasoifua maloloina mai le faamai mo tagata malaga mai fafo, ae ua molimauina ai foi le faaitiitia o le numera o tagata i Samoa ua maua i auga o le Koviti-19.
O le lipoti lata mai a le soifua maloloina mo le fitu aso ua tuanai, ua faailoa ai e na o le toafitu tagata na maua i le faamai, ae leai ni gasegase o taofia i le falemai i Motootua, e leai foi ma ni gasegase o le Koviti-19 o taofia i potu mo gasegase tigaina.
O le fitu aso ua mavae na faamauina ai tagata e toafitu na aafia i le faamai sa amata faitau mai i le Aso Sa 18 o Setema e oo mai i le Aso Sa 25 o Setema. O lea aofaiga ua oo atu ai le numera o tagata i le atunuu ua maua i le faamai i le 15,941. Ua aofia ai i lea aofaiga ma le 180 o tagata na malaga mai fafo na maua ia latou suega o loo aafia i auga o le koviti.
O faamaumauga a le soifua maloloina i le aiofaiga o tagata ua mae’a tui e lua, o le 18 tausaga ma luga atu le matutua ua 94 pasene, 12 i le 17 tausaga le matutua e 93 pasene, 5 i le 11 tausaga e 92 pasene. Ua 78,675 tagata ua mae’a le tui faaopoopo muamua poo le booster, ae na o le toa 996 tagata ua mae’a le tui faaopoopo lona lua.
Mai le aso 3 o Setema e oo mai i le aso 18 o le masina lava na tea nei e 2,054 tagata na faimalaga mai fafo ina ua toe tatala malaga masani i le aso muamua o Aokuso. O le malaga pito toatele a le Air New Zealand na taunuu i le aso 22 o Setema e 297 le pasese, sosoo ai le malaga toatele a le Qantas mai Ausetalia o le aso 20 o Setema lava e 267 le pasese.
O le malaga pito toaitiiti le pasese na afea Samoa o le malaga a le Fiji Airways mai Amerika o le aso 17 o Setema e 66 le pasese.
