O le mae’a o feiloa’iga ta’ito’atasi a minisita o le Kapeneta ma le tamaitai Palemia i le amataga o lenei vaiaso i le Aso Gafua na faia ai ma le faai’uga a le Palemia le afioga Fiame Dr Naomi Mataafa e faamālōlō ma faamuta tofi minisita o le sui Faipule o Palauli le Falefa le afioga Leota Laki Lamositele Sio, o le tofi minisita o le sui faipule tamaitai o Palauli 1 le afioga Mulipola Anarosa Ale Molioo, ma le tofi minisita o le sui faipule o Falealili 1 le afioga Toelupe Poumulinuku Onesemo.

O se saunoaga faalauaitele a le ta’ita’ifono o le vaega faaupufai o le Faatuatua i le Atua Samoa ua Tasi i luga o upega tafa’ilagi i le po anapo na ia faailoa ai lea faai’uga a le Palemia.

Ua to’afā ai nei minisita ua faamuta e le Palemia o latou tofiga i le Kapeneta i le tuana’i o lana faai’uga i le Aso Faraile na te’a nei ua faamuta ai le tofi minisita o le susuga Laauli Leuatea Polataivao Fosi Schmidt.

Le ta’ita’ifono o le vaega faaupufai o le Faatuatua i le Atua Samoa ua Tasi, Susuga Laauli Leuatea Polaivao Fosi Schmidt.

O tofiga minisita ua faamuta o le Matagaluega o Tina ma Tamaitai Atina’e o Afio’aga ma Agafesoota’i lea sa tauave e le afioga Mulipola Anarosa Ale Molioo, Matagaluega o Fesoota’iga ma Faamatalaga Faatekonolosi sa tauave e le afioga Toelupe Poumulinuku Onesemo, ma le Matagaluega o Pisinisi, Alamanuia ma Leipa sa tauave e le afioga Leota Laki Lamositele Sio.

E to’asefuluvalu sui faipule o le faafaletui o le pati faaupufai na auai i lana fono i le afiafi o le Aso Gafua ma sa faataunuuina ona sa ausia le numela e usuia ai lana fonotaga, peitai ua faailoa e le ta’ita’ifono o le pati i lana saunoaga faalaua’itele, e lē o iloa le mafua’aga sa lē auai atu ai isi faipule e aofia ai ma nisi o minisita o le Kapeneta.

E 35 sui faipule o le faafaletui o le vaega faaupufai o le Faatuatua i le Atua Samoa ua Tasi.