O le tuanai o le 3 vaiaso talu ona toe tatala le malaevaalele i Fagalii, o lea ua faailoa e le pulega o malaevaalele faapea le pulega o le Samoa Airways, o le Aso Lua o le vaiaso asau e toe tulaueleele ma oese ai vaalele laiti Twin Otter o le Samoa Airways ma Fagalii, ma toe faaauau ai le tautua sa faia i tausaga ua tuanai, a o lei tapunia Fagalii i le amataga o le tausaga e 2019.
E iai le talitonuga o nisi o tapenaga sa tau faamae’a ina ua uma ona tatala le malaevaalele, ua faatino le mafuaaga ua faamautu ai le aso e toe faalogoina ai leo o vaalele i lea vaega o le itumalo o le Vaimauga aemaise o le talafatai o le taulaga o Apia.
Ua faailoa e le pulega o le Samoa Airways i le lipoti a le Samoa Observer, e lima malaga masani i le aso i le va o Samoa ma Amerika Samoa, ae 3 malaga i le Aso Sa, seia vagana nisi suiga e faia ai ni malaga faaopoopo.
E iai le talitonuga o le a na o le Samoa Airways e faaaogaina le malaevaalele i Fagalii, a o tālia ai le masina fou e pei ona faailoa mai e se sui sinia o le kamupani vaalele o le Talofa Airways e faatoa foi ai lana tautua i Fagalii.
Ua faailoa lautele se finagalo o le Minisita o pulega o malaevaalele o le latou aseta poo le meatotino le malaevaalele, o Fagalii sa fausia mai le amataga mo vaalele Twin Otter lea o loo faaaoga nei ia ituaiga o vaalele laiti e le Samoa Airways.
