Ua faamaonia le siaki o le Koviti o se tasi o tagata faigaluega I luga o vaalele a le Ea Niu Sila

O lea tagata faigaluega na taunuu I le aso 28 o Fepuari I le faigamalaga na sau mai Iapani, ma na faia lona siaki I lea lava taimi ma sau e negative, peitai o le isi ona siaki na faia I le Aso Toonai faatoa uma atu, na sau ai loa ananafi ua positive

O lea ua auina atu nei lea tagata faigaluega I se tasi o nofoaga o faanofoesea ai tagata I Aukilani, ma o tagata toatolu latou te nonofo faatasi na faia uma siaki ananafi ma e negative

Faamaonia mai foi e le vaega o le soifua maloloina anapo, o se tasi e nonofo faatasi ma le case ua faamaonia na taalo ta polo poo le golf ananafi I le taeao, ma I le sau ai o lona siaki e negative e talitonu le matagaluega e maualalo le ono lamatia o I latou na I lea nofoaga, ma ua faatonuina nei foi faauo a le na latou taaalo faatasi I le malae ta polo I Remuera e faanofoesea

Sefulu ma le fa isi tagata galulue I luga o vaalele na feoai faatasi ma le ua faamaonia ua faanofoesea ma toe faia uma o latou siaki

Ae I nofoaga na asia e le ua faamaonia, e tuufaatasia tala o le taeao e na o le supamaketi a le Countdown I le malaevaalele lea na asia I le Aso Lulu o le vaiaso talu ai, mai le 12:07 i le 1:22 I le aoauli, ma ua faatonuina ai I latou sa I lea nofoaga I le taimi lava lea e tasi e mataitu lo latou soifua maloloina mo le isi 10 aso, ma afai ae amata faalogoina auga o le fulu, valaau le Healthline

O lenei case na faamaonia mai e le fomai a le kamupani vaalele, Dr Ben Johnston, ma ua faamaonia foi e le sooupu I tala a le Herald, I lalo o aiaiga a le soifua maloloina e le o faamalosia ai le tatau ona faanofoesea o tagata faigaluega a le kamupani toe foi mai Iapani, seia vagana ai le faia o siaki