Ua iai se lapataiga i mātua ma faiaoga ia sauniuni ma tapena iai i le siitia o le aofai o fanau e ono aafia i le asthma ina ua vaaia le siitia o le aofai o gasegase i le falemai a o sauni le fanau mo le toe a’e o aoga.
O le asthma e aafia ai le toatasi mai le 8 o tamaiti faapea foi i tagata matutua i Niu Sila ae o tamaiti lava o loo maua ai le 1/3 o gasegase uma e iai faaletonu i le mānava o loo taofia i falemai.
O le saunoaga a le ofisa sili o le Asthma and Respiratory Foundation, Letitia Harding sa faailoa i le One News na ia ta’ua ai o le tāua ia mo mātua ma i latou e vaaia le fanau ona iai sa latou fuafuaga mo le asthma e faasoa ia latou aoga ma faiaoga.
Na ta’ua e Harding o suesuega faavaomalo ua iloa ai e eseese mafuaaga o le siitia o le aofai o tamaiti e taofia i le falemai ona o le asthma ma e aofia ai le suiga o le siosiomaga atoa ma le ono iai o ni mea e allergic ai, suiga i lagona poo le mafatia poo le popole ma le ono avanoa foi i nisi o vairusi aemaise pe a iai i ni nofoaga e tumutumu ai tagata.
Ua unaia la e le Foundation mātua ma faiaoga ma tagata uma foi ia silafia auga o se tagata o le a aafia i le asthma, e faatetele ona tale, faatupulaia le oolo o le mānava ma tau mole ma faalogoina le fufusi o le fatafata.
