O le isi lima masina o lumanai nei o le a faaauau ai pea sauniga ma polokalame a nuu ma itumalo e faamanatu ai le 60 tausaga o le tatou tutoatasi lea e mae’a polokalame uma o lenei faamoemoe o le Malo, i le faaiuga o le masina o Me o le tausaga fou 2023.
O le Aso Gafua o lenei vaiaso na faamanatu ai e le afioaga o Falefa le 60 tausaga o le tutoatasi ma o se sauniga sa faatino i le malae o Moamoa o se tasi o malaefono o talafaasolopito o le vavau o Samoa.
Sa auai le taitai o le Malo le afioga i le tamaitai Palemia, o ia foi le saunoaga aami o le faamoemoe. O le lua a’i lea o afioaga o le itumalo faapalota o Anoamaa Numera Tasi ua latou faamanatu le 60 tausaga o le tutoatasi i lenei masina o Tesema, e pei ona sa faatino foi e le afioaga o Lufilufi i le Aso Faraile na tea nei.
Ma o le taitai foi o le Malo le afioga Fiame Naomi Mata’afa na avea ma Malo faaaloalogia i le sauniga ma polokalame sa tapenaina e le afioaga lea sa ave ai le faaaloalo i le tamaitai Palemia le afioga Fiame Naomi Matafaa na te sisiina le fu’a o le saolotoga o le Malo tutoatasi o Samoa e pei ona sa ia faatino foi i le afioaga o Falefa.
Na saunoa le suifaipule o le itumalo le afioga Alai’asa Sepulona Moananu, ma ia faailoa i le taitai o le Malo, o lona itumalo e lagolago malosi i fuafuaga fai a le Malo i soo se taumafaiga auā le manuia o tagata o le atunuu.
O se tasi o polokalame o le faamanatu ai e le afioaga o Falefa o le 60 tausaga o le tutoatasi, o le faalelegapepe sa faaeva ai galuega alofilima a matuau’u ma le auseepapa o le faalauiloa o ie o le Malo ua mae’a ona lalagaina ma o se tasi o galuega a tina o lenei tausaga ua lata ina mae’a.
